Kiew ka jingïoh kem nong Nigeria sha ka 12 ngut, uwei uba la sah 3 snem ha Ri

Syllad | The Rising MeghalayaSeptember 15, 2019

KHLIEHRIAT: Ka jingiohkem nong Nigeria ki Pulit jong ka East Jaiñtia kala kiew sha ka 12 ngut hadien ba kila ïoh kem sa lai ngut hynne ka step haka shnong Ratacherra.

Ïa kine ki lai ngut la ïathuh bala bat ïaki na ka bos Night Super ba kamai Silchar-Guwahati haka por ba khynra kali.

Halor kane ki Pulit jong ka East Jaiñtia Hills District kila register case bad la pyngngat ïaki haka kyndon aiñ Foreigner’s Act.

Arngut napdeng kine kiba shah kem kila wan na dewbah Africa sha Bangladesh bad kila rung beaiñ sha ka Ri haka 13 tarik une u bnai.

Ka khubor ka ïathuh ba uwei napdeng kine ki nong Nigeria la kynnoh ba u dei uba shong la sah hapoh ka Ri India la 3 snem lynter bad u ba don kam sniew.

Halor kane ka jingiohkem ïa kine ki nong Nigeria ka jingtohkit ki pulit kala ïaid shakhmat ban wad bniah ïaka jingthmu jong ki na kaei ka daw ba ki rung beaiñ sha poh ka Ri India.

U Superintendent of Police, East Jaiñtia Hills District ula kyntu ïa ki paidbah kiba don jingtip ïaki briew kiba donkti ban ïarap pynkam shilliang ïa kine ki briew na Bangladesh shapoh Ri India. Kino kino kiba ai jingtip yn burieh ïaka kyrteng.

Kino kino kiba don jingtip phone ha une u niomber jong u SP, East Jaintia Hills 9485178835 lane shu phah da ka email: [email protected].