Kiew ka jingioh khajna GST ka Jylla sha ka T.1732 klur ha u 2023-24: Sorkar

Syllad | The Rising MeghalayaSeptember 8, 2024

Ka jingioh lum ia baroh ka khajna GST naduh u bnai Iaiong haduh u Nailar 2024 na ka bynta ka Jylla Meghalaya ka long haduh T.772 klur tyngka.

Ka jingioh lum ha kaba kum kane ka juh ka por ha u snem 2023 ka long T.737 klur kaba pynpaw halor ka jingkiew kaba 5% ka jingioh, ong ka Tnad Pla Tyngka ka Jylla lyngba u kyrwoh haka 7 tarik Nailur.

Ka jingkiew na ka bynta kiwei pat ki jylla ha ka thain Shatei Lammihngi ka long – Assam 7%, Arunachal Pradesh -8%, Manipur 11%, Mizoram 1%, Nagaland 0%, Sikkim -16% bad ka Tripura 11%, ong u kyrwoh.

Ka la ong ruh ba ka sorkar Jylla ka la shim ia ki sienjam ban pynlong ia ki jingpynshai paidbah khamtam hapdeng ki dukan rit kiba thied ia ki mar ki mata na shabar ka Jylla khnang ban pynthikna ba ki invoice ki pynmih ia ki address jong ka Meghalaya khnang ba ka jingioh lum lyngba ka GST kan leit sha ka jylla Meghalaya.

Ka la ong ruh bala pynlong ia ka jingpeit bniah kaba jur halor ka return khnang ban lah ban pynthikna ba kan ym don ka jinglait jong ka khajna .”

Ha une u snem mang tyngka ba mynta, ki la don haduh 376 tylli ki case ba kot ia ka T.121 klur ki dang don hapdeng ka jingbishar, ong ka Tnad, da kaba bynrap ba ka khubor ba dang shen halor ka jinghiar ha ka jinglum ia ka GST jong ka Jylla ka dei kaba la kdew tang na ka bynta ka jingioh lum ba shi bnai, kata ha u bnai Iaiong 2024.

Nalor kata ka tnad ka pyntip ruh ba ka jinglum GST jong ka Jylla kaba kynthup ia ka SGST, IGST bad CGST ka pyni shai halor ka jingkiew shaphrang.

Shuh shuh ka la ong ba ka jinglum khnang GST ka Jylla kala sakhi ia ka jingkiew kaba 35.87%, 32.12% bad 16.66 % hapdeng u snem 2021-22, 2022-23 bad 23-24. Ka jinglum GST kala kiew na ka T. 1118 klur ha u 2021-22 sha ka T. 1723 klur ha u 2023-24.