Kiew ka pang khlam COVID-19 ha East Jaintia Hills, la khang iaka Star Cement

Syllad | The Rising MeghalayaSeptember 11, 2020

Hadien bala iabit pang COVID-19 sa 118 ngut ha Star Cement, u District Magistrate jong ka East Jaintia Hills mynta ka sngi ula pynbna containment zone syndon iaka Star Cement baroh bad la khang pyrshah ban rung mih klumar ki paidbah sha kane ka kharkhana.

Katkum ka kaiphod jong ka tnad ka koit ka khiah na East Jaintia Hills ba ki don 110 ngut ki briew kila dep leh random testing bad 8 ngut kiba wanphai na bar jylla la pynthikna ba kila iabit khlam COVID-19 haka 10 tarik Nailur. Kine baroh kiba dei ruh ki high risk contact na uba iabit khlam nyngkong na kane ka kharkhana.

Ka tnad ka koit ka khiah kala kyrpad ia u District Magistor ban pynbna noh iaka MTEPL, CMCL bad ka Star Cement Meghalaya Limited kum ka containment zone ban pyndep iaka contact tracing ia kito kiba iakynduh bad kiba ioh pang COVID-19 kumjuh ban pyndep iaka Antigen test/RTPCR ia baroh ki high risk contact bad ki low risk contact.

“Ban pyndep iaka contact tracing la khang ban rung ban mih klumar sha kane ka kharkhana kaba shah ktah na ka khlam COVID-19 naduh ka shiteng synia 11 Nailur (September) haduh 6 baje mynstep jong ka 14 tarik u Nailur (September) 2020 na ka bynta ban ai jingiada ia u paidbah bad ban tem iaka jingpur ka khlam COVID-19,” ong u District Magistrate.

Kumban shu pynkynmaw ba u District Magistrate haka 8 tarik une u bnai ula pynbna ia kane ka kharkhana kum ka micro containment zone hadien bala iabit khlam COVID-19 haduh 39 ngut.