Kiew ki nongpang COVID-19 ba donkam lyer, yn buh ar tylli ki Oxygen Plant ha West Jaintia Hills ong u Wailadmiki Shylla

Syllad | The Rising MeghalayaMay 14, 2021

U Ma Wailamiki Shylla, MLA Jowai, ula ong ba hadien bala kiew ka jingiabit khlam COVID-19 ha West Jaintia Hills District, kumjuh ka sor Jowai, ka sorkar lyngba ka tnad ka koit ka khiah kala rai ban buh ar tylli ki Oxygen Plant kaba kynthup ha Jowai Civil Hospital Ialong bad ka Maternal & Child Health Hospital, Panaliar, Jowai.

“Ka daw bala rai ban buh ia ki ar tylli ki Oxygen Plant ka dei namar bala kiew ka jingdon ki nongpang COVID-19 kiba donkam ban sumar da ka oxygen kiba hap haka kyrdan Type C bad D, dei halor kane ka la rai ban buh ha baroh ki hospital,” la ong u ma Wailadmiki Shylla haba kren bad ki nongthoh khubor haka jingjurip iaka Jowai Civil Hospital Ialong bad ka MCH Hospital ha ka sngi Thohdieng.

Ha kane ka jingjurip la iadonlang u Deputy Commissioner, West Jaintia Hills District u Garod LSN Dykes, IAS, u DMHO West Jaintia Hills District KC Ajar bad kiwei kiwei.

Shuh shuh u ma Wailadmiki ula ong ba ka jingpynkhreh ban shna iaka Oxygen Plant kala iaid shait shait ha Ialong bad hapoh 10 sngi kila dep ban shna iaka iing, katba ha MCH Hospital pat yn shna iaka Oxygen Plant haka ki ïing prefab building ban pynbiang iaka jingdonkam kyrkieh kane ka hopsital kaba la pynkylla kum ka COVID-19 hospital.

Ki kor ki bor kila don ha lynti bad ha kine ki kyndiat sngi kila poi ha sor Jowai.

Ula ong shuh shuh ba mynta ka MCH kala don 8 tylli ki ventilator bad haduh mynta ki tyndong oxgygen ki dang biang bad yn pyrshang shuh shuh ban pynbiang iaki jingdonkam ban iarap iaki nongpang COVID.