Kiew Lum Sohpetbneng Ka Seng Khasi Kmie ban ai nguh Blei ban ïada na ka khlam ka ngoh

Syllad | The Rising MeghalayaMay 13, 2021

Namar ka jingkiew sted kynsan jong ka khlam ka ngoh, COVID-19, ha kine ki khyndiat sngi mynta, arngut na ki dkhot ka Kynhun U Tymmen U San ryngkat bad U Shongknor ka Kynhun U Lum Sohpetbneng jong Ka Seng Khasi Kmie, Mawkhar, Shillong, ki la kiew sha Lumsohpetbneng ba kyntang ha ka 12 tarik, Jymmang, 2021, sngi Ïew Lyngka, ban pynlong ïa ka nguh Blei, dem Blei, ha ryngkat ka khnong, ka bishar ba Un ri, Un da, Un ker ïa ngi lang baroh na kane ka khlam ka ngoh bad ba kane ka jingpang kan duh kan dam bad jah noh sha ka rngai.      

Ha kum kine ki por ba u khun bynriew ka pyrthei baroh kawei u don hapdeng ka jingtynjuh bad jingialeh ban ïada ïalade na ka khlam ka ngoh ba shyrkhei, na ka liang jong ka Seng Khasi Kmie, kala kyntu kynpham ïa baroh ki kur ki kha bad ki para bynriew baroh bad kin long kiba phikir bad sumar ïalade, da kaba bud ryntih ïa baroh ki adong adit kumba la bthah da ka tnat ka koit ka khiah, khnang ba ka khlam ka ngoh kan nym ioh lynti ban saphriang bad pynjynjar ïa ngi.