Kino kino ki party kiba thaw EC ha ki ADC ki donkam ia ka jingkyrkhu ka NPP: Ampareen

Syllad | The Rising MeghalayaDecember 6, 2024

Ka Nongialam ka NPP bad Myntri Sorkar ka Kong Ampareen Lyngdoh ha ka 5 tarik Nohprah ka la ong ba kan long kaba shem shitom shibun ia kino kino ki party ki ban sa thaw ia ki Executive Committee ba thymmai ha ki Autononmous District Council (ADC) ba kin lah ban pyniaid ia ki kam ki jam lada kim ioh ia ka jingkyrkhu jong ka National People’s Party (NPP) kaba ialam ia ka Sorkar hapoh ka Jylla.

Haba kren sha ki lad pathai khubor, ka Ampareen ka la ong, “Ngan dang sngewthuh halor kaei ka mat jong kane ka elekshon MDC. Hynrei, kawei ka kam..phi lah ban ioh ia kano kano ka party ka ban thaw ia ka EC ha kano kano ka District Council, hynrei lada phim ioh ia ka jingkyrkhu jong ka NPP kan long kaba eh shibun ia phi ban seisoh ha kano kano ka kam.Kane ka dei ka kam kaba iaid ha ka sain pyrthei.”

Da kaba pynpaw ba ka NPP ka long kaba la pynkhreh ban iakhun ia ka elekshon MDC, kane ka Myntri ka la ong, “Kumba long ha kiwei pat ki elekshon, balei ba ngi ruh ngin ym pynleit jingmut ia ka elekshon MDC, hooid, kum ka party ngi la pynleit jingmut bha.Kin don beit ki jingeh.Kaei ka elekshon kaba khlem ki jingtyngjuh? Kumno ka result kan long , ngim dei ki nongbatai kupar ban batai lypa ia kaei ka ban sa jia.”

Nalor kata ka la ban jur halor ka jingdonkam ia ki nongkitkam ka party ba kin trei shitom bad ai ia ka report card kaba biang hashuwa ka jingpynlong ia ka elekshon.