Kitbok ka MSOA ia ka kynhun ka ban leit ia aireng ha ka 3rd North East Games 2024 ha Nagaland

Syllad | The Rising MeghalayaMarch 16, 2024

Ka Meghalaya State Olympic Association (MSOA) ha ka 15 tarik Lber, ka la pynlong ia ka prokram ban ai ka jingkitbok kitrwiang ia ka kynhun ialehkai ka jylla kaban mih haka sngi Saitjain ban leit iashim bynta sha ka lympung ialehkai jong ka thain ka “3rd North East Games 2024” ka ban long ha Nagaland naduh 18-23 Lber.

Ha kane ka kynti, ka MSOA ka la sei madan ia ka kynhun ka ban iakhun haduh 14 tylli ki jait jingialehkai kaba kynthup ia ka Archery, Athletics, Badminton, Basketball, Boxing, Football, Belt Wrestling, Freestyle Wrestling, Lawn Tennis, Pencak Silat, Table Tennis, Taekwondo, Volleyball bad Wushu.

Haba khein kyllum lang baroh, ka Meghalaya ha kane ka kynti kan sei madan haduh 249 ngut tang ki nongialehkai bad ban bynrap lang ia ki Coach, manager, nangta u Chef-de-Mission, Assistant Chef-de-Mission bad kiwei kiwei.

Ia kane ka jingialang la pynlong ha SSA Stadium, First Ground Polo, ha ka jingiadon lang I Kong Isawanda Laloo (IAS) iba bat ruh kum ka Director Sports & Youth Affairs ka sorkar Jylla kum ka Kongsan ha ryngkat u Working President bad General Secretary ka Meghalaya State Olympic Association u bah John F. Kharshiing bad u bah Finely Pariat nalor ki coach, Ki manager bad ki nongialehkai na baroh ki 14 tylli ki jait jingialehkai.

Haba aijingkren  kum ka Kongsan, ka Kong Isawanda Laloo ka la ai mynsiem bad  pynkynmaw ia ki nongialehkai da kaba ong ba ha kane ka kynti ki la donkam ban ialehkai kham bha shuh shuh bad ban pyrshang katba lah ban kyntiew haduh lai shah  ia ka jingkhur  takma na kaei kaba ka la ioh khur ha une u snem ba la dep na kane ka Jylla.

Nalor katta ka kong Isawada ka ngeit ba man la ki nongialehkai ki ban mihkhmat ia ka jylla ki la dep ban ia kilan bha ialade, kum shi bynta ka jingpynkhreh ia kane ka lympung .

Kiwei kiwei pat ki nongkren ha kane ka jingialang ba la pyniaid da ka kong Rida Lyndem ki kynthup ia u Bah John F. Kharshiing, bah Paia Warnongbri Asst Director Sports & Youth Affairs, katba ia ka kyntien ai khublei la ioh na u Bah Finely L. Pariat.