Kitbok ka UDP Mawlai ia ka kynhun ki thei Meghalaya kiba leit iakhun Cricket sha Surat

Syllad | The Rising MeghalayaOctober 6, 2023

Ka United Democratic Party (UDP) Mawlai Circle ka ai khublei bad kitbok kitrwiang ia ka kynhun ki thei ka Meghalaya Cricket Association (MCA) kiba la leit ban iashim bynta bad mihkhmat ia ka jylla ha ka BCCI’s Women’s U-19 One Day Trophy ka ban ialehkai ha Surat, Gujarat naduh ka 8 tarik mynta u bnai Risaw, 2023.

Na ka liang u Bah P.T Sawkmie, adviser lem bad u Bah H. Kharkongor, president  ka UDP Mawlai Circle, bah T. Kharkongor, secretary bad kiwei de ki nongkitkam ka seng ki la pynpaw ka jingsngewkmen kaba khraw ba ki samla kynthei jong ka jylla kin ioh ka lad ban  leit iashim bynta ha ka jingialehkai BCCI ha ka jylla Gujarat.

Ha kajuh ka por u Bah Sawkmie u kyntu ia ki ba kin ia khun tyngeh ban poi sha ka thong jong ka jingjop.

U la ong ruh ba dei tang lyngba ka jingtrei shitom ka ban iarap ia ki haba ki leit ban  mihkhmat ia ka jylla, bad lehse kan poi ka por ba kin ioh lad ruh ban mihkhmat ia ka ri India.