Kitbok kitrwiang bad pynkup burom iaki khynnah ialehkai ka RC Evening School Mihmyntdu kiba jop na ka Subroto Mukherjee Cup

Syllad | The Rising MeghalayaAugust 8, 2022

Ki bor pynïaid ka Roman Catholic Evening School Mihmyntdu, West Jaintia Hills District kila pynlong ka jingïalang pynkup burom ïaki 25 ngut ki khynnah ialehkai ka skul kiba la wanrah nam ïaka skul bad ka District hadien ba kila jop naka State Level Subroto Mukherjee Cup Football Tournament kaba pyniaid da ka tnad Directorate of Sports & Youth Affairs jong ka sorkar jylla.

Kumban shu pynkynmaw Roman Catholic Evening School, Mihmyntdu, West Jaintia Hills kala jop haka kyrdan Under-14 Boys da kaba pynliem noh ia ka New Nongstoin S.S. (WKH) lyngba ka tie breaker da 4-3.

Ki khynnah ka St Anthony’s Higher Secondary School, ki thei ka Iewrynghep Secondary School kila jop haka kyrdan Under-17 Boys’ and Girls’.

Ban ai mynsiem bad kitbok kitrwiang ia kine ki khynnah ki ban mihkhmat iaka Jylla sha nongbah Delhi ha u bnai Nailur (September) ka ban sdang naduh 6 tarik.

U kongsan uba iadonlang haka jingpynkup burom kaba long ha hall ka skul u dei u MLA ka Jowai u Wailadmiki Shylla ryngkat ki MDC ka JHADC, ki shakri niam ka Balang Catholic, ki nonghikai bad ki khynnah skul

Ula ai mynsiem ïaki khynnah ban ïalehkai bha bad ban trei shitom ban ïoh rah ïaka nam lahduh bad wanrah ruh ïaka nam ka burom ïaka skul, ka District bad ïaka Jylla, ha kajuh ka por ula pynbna ban synñiang pisa 50 hajar tyngka.

Hashwa kane u DSO u Ma Khroobok Passah ula pyntip ba ka jinglut jingsep baroh na bynta ban leit ïashim bynta sha nongbah Delhi yn pynlut na ka ophis jong u DSO bad ula pyntip ruh ba napdeng ki 25 ngut ki khynnah ïalehkai kane ka skul 5 ngut la jied ban ïalehkai bad ka Shillong Lajong Sports Club.

Kiwei kiba la ai ka jingkren kyntu kynpham bad kitbik kitwriang ïaki khynnah ki long u Brighstar Chyrmang bad u Octomewot Lamin kiba dei ki MDC ka JHADC, u Fr Ferdinand Dkhar Administrator Jowai Diocese, u Fr. Lawrence Paswet Assistant Parish Priest Jowai Diocese, ka Kong Tina Lakiang Head Teacher Cum Secretary, u Waheh shnong ka Mihmyntdu u Abul Phawa bad kiwei kiwei