Kitbok kitrwiang ka Kur Phawa Siangshai ia u samla ban leit iakhun kti haka rynsan World Arm Wresling C’ship

Syllad | The Rising MeghalayaJuly 28, 2023

Ka Kur Phawa Siangshai Seng kmie ka la pynlong iaka jingialang kyrpang ban ai mynsiem bad kitbok kitrwiang ia u Shanborlang Siangshai u rang iakhun kti ba paw ka jylla u ban leit mihkhmat iaka ri India haka rynsan ialehkai World Arm Wresling Championship 2023 ka ban long ha Almaty, Kazakhstan.

Kane ka rynsan dei kaba pynlong da ka World Arm Wrestling Federation (WAF) ka ban sdang naduh ka 24 tarik Nailar haduh 3 tarik Nailur mynta u snem.

Iaka jingialang la pynlong ha iingsah u Hilarius Siangshai Adviser ka seng Kur ha Shillong haka jingiadon lang u Charles C Phawa General Secretary, u Lenar Phawa Chairman Arts and Culture, ka Meera Siangshai EC Member, u ma Donush Siangshai bad kiwei kiwei haka 26 tarik Naitung.

U Advicer u ma Hilarius Siangshai haka jingkren, ula iaroh iaka jingtrei shitom jong u Shanborlang Siangshai wat lada u don hapdeng ki jingduna haka bor met ruh. “Wat lada u dei uba duna ka bor iohsngew hynrei u lah ban pynpaw pyrthei iaka sap ba u don”, la ong u Hilarius Siangshai bad ula bynrap ba ka Kur Phawa Siangshai ka ai jingkitbok kitrwiang ba un nanglah ban ialehkai bha ha katei ka jingiakop bad ban lah ban wanrah iaka nam ka burom iaka District ka Jylla bad ka Ri hi baroh kawei.

Kum ka jingai mynsiem ia une u rangialehkai, ka Kur ka la synniang ne pynkham ehbok eh rngiew 10,000/- tyngka.

Iaka jingialang lyngkot la pynkut da ki jingduwai na u Lenar Phawa Chairman Arts and Culture.

Khyndiat shaphang u Shanborlang Siangshai u dei u khun jong ka Kong Icydora Siangshai ba shong ba sah haka shnong Khanduli, West Jaintia Hills District. Udei ruh u samla uba don ka jingduna ha ki bor ïohsngew. U Shanborlang, dangshen ula mihkhmat iaka jylla Meghalaya haka jingiakop iakhun kti kaba la long ha Mathura, Utter Pradesh bad ula ioh ban khur iaka takma ksiar (Gold Medal) bad mynta ka kynti ula shah jied pat ban leit mihkhmat iaka ri haka World Arm Wresling Championship 2023.