Kitbok kitrwiang ka shnong Mawryngkneng ia u samla ban leit pyntbit haka football sha Bangalore

Syllad | The Rising MeghalayaAugust 11, 2020

Ka Dorbar Shnong Mawryngkneng ryngkat u Sordar bad Secretary Shnong, mynta ka sngi kala leit ban ai khublei kitbok kit rwiang ia u samla Heiwanbha Dkhar khun jong i Bah Nassing Warlarpih bad i kong Lawanpyndap Dkhar hapoh ing sah jong u  ha Mawryngkneng Mission East Khasi Hills District, halor ka jingshah jied jong u ban leit shah pyntbit shuh shuh ia ka jingialehkai Football ha ka BOCA Juniors Football School Academy hapoh Bangalore India bad ha ka 22-08-2020 un sa mih na shnong Mawryngkneng ban leit sha Bangalore.

Ha ka jingim ialehkai jong u Heiwanbha, u la shah pyntbit ha ka  Academy jong ka Mawryngkneng Sports and Cultural Club naduh ka kyrdan U-12, U-14 bad ha ka Senior Team jong ka shnong ban ialehkai ha ka Second Division hapoh Polo ba la pyniaid da ka Shillong Sports Association bad ha u snem 2019 u la pyniasoh ruh bad ka Raitsamthiah Sports Club Shillong.

U Heiwanbha shah jied haka BOCA Juniors ka long lyngba ki trial hapoh Shillong bad ha  Bangalore ha u snem ba la dep bad un shah pyntbit shuh shuh kum u Mid-Fielder ha ka tei ka Academy.

Bad na ka liang jong ka Shnong Mawryngkneng kala kitbok kitrwiang ruh ia u Heiwanbha Dkhar ba un don hapdeng ka met ka phad kaba koit ba khiah bad un nang lah ban trei shitom bad ban sei ia ka sap ka phong kumba u Blei u la ai ha u bad ban wanrah ka nam ka burom jong ka shnong, ka district bad ka jylla baorh kawei.