Kitbok Shad Pomblang u MLA Nongkrem

Syllad | The Rising MeghalayaNovember 24, 2020

U Bah Lambor Malngiang, MLA & MDC ka Nongkrem Constituency uba dei ruh u Chairman ka State Planning Board ka Sorkar Jylla u la phah ia ka kyrwoh kitbok kitrwiang halor ka Shad Pomblang Syiem lane ka Shad Nongkrem ka ban long ha ka 24 bad 25 tarik mynta bnai.

Da kaba ai khublei ia ka Syiem ka Hima Khyrim, Dr Balajiedsing Syiem, ki Myntri, ki Bakhraw Batri kumjuh ia ki khun ki hajar ka Hima, u la ong, “Nga phah ka jingkhublei kitbok kitrwiang ba kane ka Shad Pomblang kan wanrah bit ka biang, ka shongshngain shongsuk ha ka Jylla baroh kawei”.

“Hynrei ka jingdon ka khlam COVID-19 mynta u snem kan pynlong ia ki khun ki hajar ka Hima Khyrim bad ki paralok paralok najan najngai ban duh ia ka lad ban wan sakhi ia ka kumba ju long baroh shi katta ki snem bad ngin nym lah ban ïohi ia ka dur jong ka kumba ju long man snem”, u la ong.

“Hynrei ngim dei ban duh jingkyrmen hynrei ngin nang iai pynrhem bad pynkhlaiñ ialade ia ka mynsiem ieid ia la ka jong ka riti dustur, ka kolshor, ka ktien ka thylliej, ka Jaidbynriew bad ka burom ka akor”, u la ong da kaba kyntu ia ki nongshong shnong ban ia shim bynta lang.

“Kum u nongmihkhmat ka Nongkrem Constituency, nga ai ka khublei kitbok kitrwiang ba ka ‘Shad Nongkrem’ kan lam sha ka suk kmen, kaba dap jingkyrkhu bad dap koit dap khiah ia phi iwei pa iwei bad ngin duai ha u Blei bad pan na u ba ka shongsuk shongshngain kan synshar ia ka Ri baieid jong ngi”, la ong u MLA