Kiwei ki seng ki don ‘price tag’ ka KSU ka pha iaka jingim: General Secretary KSU

Syllad | The Rising MeghalayaFebruary 3, 2021

U Donald V Thabah, general secretary Khasi Student’s Union (KSU) ula ong “Kiwei ki seng ki don iaka ‘price tag’, hynrei ka KSU naduh bala seng iaka ka dang ieng rasong bad ki paidbah ki shaniah tylli tyllon iaka namar ba ki iohi ba ka lah ban iada ia ki briew ba nabar kiba thmu ban thombor bad wan knieh ia ka khyndew ka shyiap jong ngi bad ban pynduh jait ia ngi. Kano kano ka kam ba trei ka KSU ka dei da ka syep, ka snam, ki ummat bad ka jingtrei met bad mynsiem wat ban pha iaka jingim naka bynta ka jaidbynriew.”

U Donald ula ong ia kine ki ktien haka jingpynskhem bad shim jingkular iaki dkhot ka tnad treikam ba thymmai ka KSU War Jaiñtia Circle ka Khasi Students’ Union Moopyut Unit, haka shnong Moopyut haka 2 tarik une u bnai.

“Ki briew ba nabar kim tieng ia u pulit, kim tieng ia u Myntri Rangbah ka jylla kim tieng ia u MLA jong phi ne ia ka District Council hynrei ki tieng tang ia ka KSU namar ia kiwei kiwei ki lah ban thied hynrei kim lah ban thied ia ki dkhot jong ka KSU. Ki dkhot jong ka KSU kim long kum kita ki mar ki mata kiba die ha surok kiba don la ka dor ba la pyndait, ki dkhot jong ka KSU kim ju don kata ka price tag hynrei ka dor kaba ma ngi, ngi don kadei tang ka syep ka snam ki ummat bad ka jingtrei met bad mynsiem wat ban pha ruh la ka jong ka jingim na ka bynta ka khia ka shon ka saw ka sian na ka bynta ka Ri bad Jaitbynriew,” la ong u Donald Thabah general secretary central body.

Ula pynkynmaw ruh ia ka jingjia ha Ichamati haduh ba uwei u dkhot jong ka KSU ula duhei ia la ka jingim bad ka jingmynsaw ki para dkhot ha katei ka jingjia.

“Kum ki dkhot jong ka KSU kampher la phi dei ban mynsaw ne kyllon iap na ka bynta ka dawbah ka jaitbynriew na ka bynta ban ohshrong ia ka lawei ba phyrnai ka pateng ba dang wan. Ngi dei ban peit bha ia ki jingpang ba wanrah ki briew ba nabar ban thombor ia ka jaitbynriew hynrei ngim dei ban klet ruh ia ki jingpang kiba mih hi nangne napoh ka Bri Hynniewtrep jong ngi kiba long ka kruin,”ula ong shuh shuh u Donald.

Ki Dkhot jong ka KSU Moopyut Unit:

President: Standly Dkhar
Vice President: Wanmi Kyndait
General Secretary: Yophi Khyriem
Assistant General Secretary: Lewis Khyriem
Organising Secretary: Lui Phawa
Assistant Organising Secretary: Khlur Dkhar
Education Secretary: Treiki Kyndait
Assistant Education Secretary: Bormi Dkhar
Sports Secretary: Heibormi Kyndait
Assistant Sports Secretary: Seibormi Kyndait

Executive Members: Akos Lyngdoh, Poibiang Dkhar, Nidwos Phawa, Harbat Kyndait, Mikit Kyndait, Shanbor Khyriem.

Iaka jingialang la pyniaid da u Aurora Pamksang, Assistant General Secretary War Jaintia Circle haka jingiadonlang ruh u Sonstar Nongkhlaw Assistant Finance Secretary, Ohibait Dkhar President Jaintia Hills District Unit, Laitphar Syngkrem President Circle, Lurman B Talang General Secretary KSU War Jaintia Circle bad kiwei kiwei.