Kloi ka HNLC ban pynkut ia ka jingkieng atiar lada ki paidbah ki kyntait ia ka Ri Hynniewtrep kaba laitluid

Syllad | The Rising MeghalayaDecember 7, 2024

Ka Seng kieng atiar Hynniewtrep National Liberation Council (HNLC) ha ka 6 tarik Nohprah ka la pynpaw ba ka long kaba kloi ban pynkut noh ia ka jingialeh da kaba kieng atiar lada ki paidbah kin jied ban iaineh bad ka Ri India bad ban kyntait ia ka Ri Hynniewtrep kaba laitluid.

Kane ka jingpynpaw ka la long kum ka jubab ia ka jingkren ba dang shen jong ka Nongialam ka National People’s Party (NPP) bad Myntri Sorkar ka Kong Ampareen Lyngdoh kaba la kynnoh ba ka HNLC ka la shu byrthen tang na khlaw, kata hadien ba kane ka seng ka la kynnoh ia ka NPP ba ka la kylla long ka atiar na ka bynta ka jingsynshar jong ki Garo, haba buh hakhmat ia laitylli ki mat jingdawa kiba kynthup ia ka jingbujli ia ka kam Myntri Rangbah ka Jylla ha ka ban pynthikna ia ka jingioh bynta lang ban long nongialam hapdeng ki jaidbynriew ha ka Jylla.

Ha ka shithi sha ka Kong Ampareen, ka HNLC lyngba u General Secretary cum Publicity Secretary u Bah Sainkupar Nongtraw ka la ong, “Lada phi kwah shisha ban ailad ia ki paid u Hynniewtrep ban shim rai, ngi kop iaphi ban pynlong da ka jingiathep vote lane ka jingiajied paidbah kaba iasyriem bad kaei kaba ka kynhun FARC ka la lah bad ka Sorkar Colombia ha u snem 2016, lane kaei kaba ki paidbah ka Scotland ki la leh ha u snem 2014.”

“Ai ba ka pyrthei kan iohi la ki paid Hynniewtrep ki kyrshan ia ka rukom pyntrei ka party jong phi ne ia ka jingialeh jong ngi ban synshar da lade. Lada ki paidbah ki kyrshan ban iai neh bad ka India bad kyntait ia ka Ri Hynniewtrep kaba laitluid ngin pynkut noh ia ka jingialeh jong ngi da ka lynti kieng atiar bad ngi kwah ban pynlut ia ka por ka jingim jong ngi hapoh phatok,” u la ong.

Nalor kata u Bah Sainkupar u la shim ruh ia ka jingkynthoh jong ka Kong Ampareen ba ka HNLC ka la shu byrngem na khlaw bad khot ia ki ban iashim bynta ha ka elekshon jong ka ri India, ba kam dei tang ka jingialam bakla hynrei ka jingbym pdiang ia ki mat ba kongsan kiba iadei bad ka jinglong trai bad ka hok jong u paid Hynniewtrep.

“Ailad ia nga ban kren beit ia kane. Ngim byrngem na khlaw namar ka jingjied hynrei namar ka jingdonkam. Ka histori ka la pyni ba haba la pynsngap jar ia ka sur jong u paidbah bad la pynkhih ia ka hok jong u, ka ri khlaw ka kylla long ka jaka rieh na ka bynta ka jingpyrshah. Ka HNLC ka ieng kum ka nongiada ia ka jinglong tynrai bad ka jinglong trai jong u Hynniewtrep, baroh ar ki la shah pynjot ha ka rukom kaba ryntih lyngba ki jingleh thok jong ka sainpyrthei bad ki jingshet kylla ha ka histori,” u la ong.

Haba kynthoh tyngeh ia ka Myntri halor ka jingkynnoh ba ka HNLC ka don ia ka mynsiem pyniapher jaidbynriew, u Nongtraw u la ong, “Phi la kynnoh ia ngi ba ngi don ka mynsiem iapher jaidbynriew, da kaba kam ba ngi kwah ban wanrah ia ka jinglong jingman kum hapoh Manipur. Ban ia nujor ia ka Hynniewtrep bad ka Manipur ka long kumba ianujor ia ka miet bad ka sngi. Ngi don la ka jong ka jaka kaba naduh u mynbarim kaba don ia ka histori bad ka kolshor kaba la suhthied bha. Ki sakhi na ki nongwad bniah ki pyni ba ngi dei kawei na ki kynhun bynriew ba la rim bha ha ka dewbah Asia. Hynrei watla katta ngim don la ka jong ka ri, ngi la shah shet kylla ha ki sorkar kawei hadien kawei kiba la pynjah burom ia ki Syiem jong ngi bad ym khein snep ia ka jingaiti lut jong ki khun u hajar jong u Hynniewtrep.”

Nalor kata ka shithi ka ong ruh, “Phi kam ba phi mihkhmat ia u paidbah, hynrei na ka kamra thiah ba aram jong phi? Ka jingkam nongialam jong phi ha iing dorbar thawain ka Jylla ka dei ka jinglehrain kumba la sakhi ha ka video kaba la saphriang ba phi iohthiah ha kiba bun ki khep. Ka nongthaw ain ba jaituh bad nongmihkhmat ba iohthiah lyngngai phi la shet shukor ia ka jingshaniah ba la ai ha phi. Hato kane kadei kata ka kam nongialam.?

Shuh shuh une u nongialam ka HNLC u la ong ruh, “Ka Histori kan kynmaw ia phi kum ka dur jong ka jyrsieh tah sia lieh, ka nongthaw ain ba la don dak thohbria. Katba kiwei ki ieng ban mad ia ka jingbishar ba hok, phi pat phi kiar bad rieh ha ka bor sain hima  jong u Conrad Sangma. Phi ieng kum ka nongialam bamsap, ka nongmihkhmat kaba donkti ha ka kam bymman kaba pyndonkam ia ka bor sain pyrthei ban lait na ki jingshisha.Hato ka dei kane ka nam kaba phi kwah?”

“Kong Ampareen, ka HNLC ka ieng khlem khih bad khlem pyndem, ka kyntait ban iatylli bad kano kano ka seng sain pyrthei. Ngi iohi lyngba ki buit jong ki, la ka long u suri Garo uba phong jain langbrot ne u Myrsiang Khasi uba don ka shyntur rupa, baroh ar ki ialam ia ki briew jong ngi sha kajuh ka sem masi Hindu jong ka jingshah pyndem. Ngi kyntait ia ki jingkren thylli jong ki, ia ki jingkular lamler jong ki, bad ia ka rukom synshar jong ki kaba la tei ban teh kynjri ia ngi. Kane kam dei ka jingialeh na ka bynta ki shuki, ki kyrdan, ne ka borkane ka dei ka jingialeh na ka bynta ka jingim, ka jingsynshar, bad ka jingpyllaitluid ia u Hynniewtrep,” u la pynpaw shuh shuh.