Kloi ka sorkar ban iakren bad ka HNLC shabar ka jylla, yn plie lynti laitluid ia ki nongialam: Dy CM

Syllad | The Rising MeghalayaNovember 22, 2023

U Symbud Myntri Rangbah ka jylla uba khmih ia ka Tnat kam Pohiing, u Bah Prestone Tynsong haka sngi Balang u la ong ba ka Sorkar Pdeng bad Sorkar Jylla ki long kiba kloi ban pynlong ia ka jingiakren iasuk bad ki nongialam ba hakhliehduh jong ka Seng Hynniewtrep National Liberation Council (HNLC) shabar ka jylla.

Haba kren sha ki lad pathai khubor, u Bah Tynsong u la ong; “Nga kyrpad ia ki nongialam ba hakhliehduh ka HNLC ba kim dei ban don ia ka jingsngew buhkhoh ne artatien namar ngi na ka liang ka sorkar, kata la ka long na ka sorkar jylla ne sorkar pdeng ngi don ia ka jingkut jingmut kaba shisha.”

“Lada phi sngew ba kam long kaba shngain ban pynlong ia ka jingiakren hangne hapoh ka jylla Meghalaya, ngi long kiba kloi ban iakren sha kino kino ki jaka. Lada phi kwah ban iakren lehse sha Kolkata lane kiwei pat ki jylla ngi long kiba kloi na ka bynta kata,” ong u Myntri.

“Kumta ka jingkyrpad ka jong nga ia ki nongialam ka HNLC ka long kaba shai kdar, kata ka jingkhang ka dang iai plie bad ngi kyrpad ia ki ba kin wanphai sha ka jingiakren iasuk,” u la ong shuh shuh.

Na ka liang u Chairman cum Commander In Chief ka HNLC u Bah Bobby Marwein bad u General Secretary cum Publicity u Bah Sainkupar Nongtraw dang shen ki la pynpaw ia ka jingbym lah ka jong ki ban wan iashim bynta ha ka jingiakren tad haduh ba ka sorkar ka long lakloi ban weng shwa ia baroh ki case kiba dang sahteng pyrshah ia ki bad ruh ban iasoi ia ka jingiamynjur sangeh iasiat.

“Nga la iohi ia ka jingpynpaw ba dang shen jong ka HNLC, hynrei ka jingkyrpad ka jong nga sa shisien pat ia kane ka kynhun ka long, sngewbha wanphai sha ka jingiakren namar tad hadien bad lymda ngi la iakren markhmat halor kaei kaba phi angnud ngin ym poi shano shano ruh. Ngi kut jingmut da shisha, ym duna ia ka lai ne saw bnai, ngi la shimkhia ha kaba iadei bad ki dkhot jong ki, kata la ka long halor ka jingshngain bad kam shym la don ruh kano kano ka jingkem, kumta balei ba phin don ia ka jingsngew buhkhoh,” ong shuh shuh u Symbud Myntri Rangbah ka jylla.