Kloi u Myntri Social Welfare ban iatreilang bad u MP halor ki mat kiba ktah ia ka Jylla

Syllad | The Rising MeghalayaOctober 24, 2024

U Myntri ka Tnad Social Welfare ka Jylla u Bah Paul Lyngdoh u la ong ba u khmih lynti ia ka jingiatreilang bad u MP ka VPP na Shillong u Dr Ricky AJ Syngkon halor ki katto katne ki mat kiba ktah ia ka Jylla bad ki paidbah nongshong shnong.

Haba kren sha ki lad pathai khubor haka 24 tarik u Risaw u Bah Paul u la ong ba u la pynlong ia ka jingiakren kaba seisoh bad u Dr Syngkon ha kaba iadei bad kane ka phang.

“Na ka liang u MP u kwah ia ngi ba ngin shim ia ki sienjam ban iatreilang ha ki bynta bapher bapher khamtam ha kaba iadei bad ka imlang ka sahlang, kata da kaba pyrkhat khia halor ki jingeh kiba la kiew rasong namar ka jingbun jong ki nongdih drok bad ki nongkhaii drok bad halor ka jingbun jong ki longiing kiba don tang ka kmie. U la ai ruh katto katne ki jingai jingmut kiba kordor,” ong u Bah Paul.

“Nga la pynleit jingmut bha ia ka jingai jingmut ka jong u bad ngin sa khmih kumno ban pyniaid shakhmat ban iatreilang halor ki katto katne ki mat kiba kongsan kiba ktah ia ka bha ka miat jong ka Jylla hi baroh kawei,” bynrap u Myntri.