Kmen ka KSU ban wanphai biang ka dur barim ka Wah Lukha

Syllad | The Rising MeghalayaApril 11, 2020

Ka Khasi Students’ Union (KSU) Sonapyrdi Unit ka la pynpaw ia ka jingkmen ba la jyrngam biang ka Wah Lukha kum ha ki por mynshuwa. Ka KSU kala ong ba ki dohum dohpnat ruh ki la sdang khie im biang ha kane ka wah.

Ka KSU kala sakhi ia kane haka jingkhang khyrdep ki kharkhana dewbilat ha thaiñ Narpuh namar ka Lockdown jong ka sorkar pdeng bad sorkar jylla ban iakhun pyrshah u khñiang jingpang COVID-19.

Ka KSU kala ong ba kane ka wah kala wanphai biang sha dur kaba barim jong ka ha kaba kala itynnad bad jyrngam kum ha ki por ba la leit shwa u snem 2007 bad kala kynthoh ba kane ka jingkylla rong blue ka wah Lukha, kala pynshisha ba kadei na ka jingpyntuid jakhlia ki kharkhana dewbilat sha ka Wah.

Ka KSU ka dawa na ka sorkar jylla ba ka dei ban leh da kaba tyngeh bad daiñ kuna da ki klur lada kitei ki kharkhana ki dangiai bteng ka jingpyntuid jaboh sha ki wah.

Ka sorkar ka dei ban hukum mardor ia kitei ki kharkhana ban pynbiang ki STP, ETP ne ki jaka pynlang iaki jaboh bad ba kin dei ban pyllait pathar sha ki um ki wah bad pyntuid sha ka wah Lukha.

Kiwei kiwei ki jylla ne ki ri ka pyrthei ki roi ki par namar ba don ki Kharkhana ne Industries, ki wanrah ka iohkam iohjam, hynrei ki wah ne ki um kim juh jaboh ne shah ktah namar ki biang ki jaka pynlang jaboh katkum ka juk shai mynta. Kumta ka sorkar MDA kaba heh tyngam ban iada iaka mariang ka dei ban peit ia kane ka nuksa namar ba hadien ka jingkhang khyrdep iaki kharkhana kane ka wah kala wandur biang sha kaba rim bad kadei ban shna ki ain ki kanun kiba don bniat khnang ba kine ki kharkhana kin nym ioh lad ban leh pathar bad pynjot iaka mariang.

Ka KSU ka ong ruh ba ka wah lukha ka shait jyrngam ha kine ki por, hynrei ka jingjyrngam kam shym neh slem namar ka jingpyntuid jaboh ka bteng na kitei ki kharkhana, hynrei na ka lockdown kala wanrah ka jubab kaba shai ba ki kharkhana ki don bynta ban pynkylla rong iaka wah.

Mynta pat ka jingjyrngam ka wah lukha ka neh bad ka nangiai jyrngam bad khuid, namar ba khang khyrdep kitei ki kharkhana. Ka wah lukha kan ym khuid lano lano ruh lada kitei ki company ki iai bteng ban pyntuid jaboh.  

Shuh shuh ka KSU kala ïohlad ruh ban iakren bad ki nongshongshnong ba don marjan bad kitei ki kharkhana dewbilat ha Narpuh bad kila iathuh ba mynta naduh ba la khang khyrdep ia kitei ki company, ki shnong ki thaw ki la khuid biang, ka mariang sawdong jong ki shnong ka la jyrngam, ym don pum pum shuh. Katto katne ki longkmie kitei ki shnong ki la iathuh ba la suk ka sar ing sar sem ym don pum pum shuh naduh ba khang company kaba pyni baka tdem bad pum pum ba mih na kitei ki kharkhana ka ktah ia ki briew bad ki shnong ba don marjan. 

Ki nongialam ka KSU Narpuh u SL Suchiang Publicity Secretary KSU bad WD Gympad General Secretary KSU Sonapyrdi Unit kila pynpaw ba ka lockdown kala ai ka jubab kaba shai ba ki kharkhana ki don ka bynta kaba kongsan ban pynjaboh iaka wah Lukha, kumta ka sorkar ka dei ban shna ki aiñ kiba pyrkhing bha khnang ban khie im biang ka wan Lukha sa shisien.