Kmen ki paidbah phra shnong ba plie u MLA ka Umroi ia ka Nongtraw Sub Centre bad HWC

Syllad | The Rising MeghalayaApril 15, 2025

Ka la long da shisha ka jingkmen kaba khraw ia ki paidbah nongshong shnong jong ki phra tylli ki shnong kiba hap hapoh ka Bhoirymbong C&RD Block hadien ba u MLA ka Umroi u Bah Damanbait Lamare ha ka 14 tarik Iaiong u la leit ban plie paidbah ia ka Nongtraw Sub Centre-Health & Welness Centre.

Ka Sub Centre kan ai jingshakri ia ki paidbah na ki phra tylli ki shnong ki ban kynthup ia ka Nongtraw, Nongtraw Bangla, Lumdiengngan, Lumrit, Kyrdeng, Wahmyntait, Mawkduk, Umsarang bad ia kane ka Sub Centre la tei ha ka jinglut kaba la kot kumba 55 lak tyngka lyngba ka skhim PM-ABHIM NHM ba la pyntrei da ka Nongtraw VHC.

Ha kane ka sngi plie nalor u MLA ka Umroi Constituency la ia don lang ruh ka Dr A Kharduid, District Medical and Health Officer ka Ri Bhoi District, u Bah Robert Dympep, Rangbah Shnong ka Nongtraw, ki riew rangbah nalor ki nongtrei ka tnat ka Koit ka Khiah, ki nongtrei ASHA bad Aganwadi nalor ki nongshong shnong.

Haba aijingkren ha ka jingialang, u Bah Damanbait u la pynpaw ia ka jingkmen kaba khraw ban ia donlang ha kane ka sngi ka ban sah jingkynmaw na bynta ki Shnong ki thaw ka thaiñ Nongtraw, da kaba ong, ba ka jingdon jong kane ka Sub Centre kan nang ai jingmyntoi shikatdei eh ia ki nongshong shnong jong kitei ki phra tylli ki shnong ha kaba iadei bad ki lad jingsumar hapoh kane ka thain bad ban lait leit ruh shaduh ka Bhoirymbong CHC.

U la ong ruh ba ki paidbah ki dei ban shim kabu ban ioh ia ki jingsumar bapher bapher, khamtam kito ki longkmie ba armet, ki khyllung khynnah kiba dang donkam bha ia ki jingsumar, ki jingdonkam ban ai injek ban iada na ki jingpang bapher bapher, da kaba kyntu ruh, ia ki nongtrei jong kane ka Sub Centre ba kin ai ka jingshakri kaba paka bad ba janai na bynta u paidbah bad ban kiar ruh na kino kino ki jingshah pynthohbria.