Kmen ki rit paid Hindu ka sor Jowai ba ioh jaka thang briew ba paka, yn shna sa da elektrik

Syllad | The Rising MeghalayaMarch 14, 2024

Ki rit paid Hindu ha Jowai ki la pynpaw ka jingkmen ban ioh ia ka jaka thang briew kaba kyrpang- Kambel Shullai Eco-Friendly Crematorium ka Seiñraij Jowai ia kaba la wan plie da u MLA ka thain u Bah Wailadmiki Shylla uba dei ruh u Chairman ka MUDA ha ka 12 tarik mynta u bnai.

Ia kane ka jaka thang briew kaba lait na ka jingpynjakhlia ia ka mei mariang la shna ha ka lynti surok bypass na Khliehtyrshi sha Treiongriang, bad kane ka la wan urlong da ka jingtrei borbah jong ka Jowai Municipal Board bad ki dkhot ka Hindu Samaj Committee kiba shnong ba sah ha sor Jowai.

Ia kane ka jaka thang metiap la bei tyngka da ka 5th Finance Commission ha ka jinglut kaba T.37 lak, ha kaba ia ka jaka la noh synniang na ka liang ka Dorbar Shnong Khliehtyrshi.

Haba kren kum u Kongsan ha ka jingialang u bah Shylla u la pynpaw halor ka jingdonkam ban khmih ia kiba bun bah ki jingdonkam hapoh sor Jowai, kata da kaba phaikhmat ruh ha kaba iadei bad ka jingpynneh pynsah ia ka mei mariang, kata kaba dei ruh ka bynta ka jong u kum u Chairman ka Environment Committee ka Meghalaya Legislative Assembly.

Nalor kata u la pynpaw ruh halor ka jingdonkam ia ki projek ki ban kyntiew ia ki nongshong shnong rit paidbah bad pynpaw ruh ka jingsngewnguh ia ka Tnat Urban Affairs bad ia ka Sorkar halor ka jingkyrshan ka jong ki ban pynurlong ia kane ka projek bathymmai ha Khliehtyrshi.

Ha kajuh ka por u MLA u la pynbna ruh halor ka jingthmu ban shna noh shen da ka jaka thang briew kaba da ka bording ilektrik ne ka elektrik crematorium.

Ha kane ka jingialang ba la pyniaid da u Bah Philanderwell Lyngdoh, Chairman of JMB la ioh ruh ka jingkren na u president ka Seiñriaj Jowai u H. Toi, Dolloi ka Elaka Jowai u Puramon Kynjing, Waheh Chnong ka shnong Khliehtyrshi u Bah  Kitbok Rymbai, u President ka Shmashana Committee u Sir De nalor kiwei pat.

Katba na ka liang ka Chief Executive Officer ka JMB, ka Kong DV Lyngdoh (MCS), ka la ai ia ka jingkren ai khublei.