Kmen u Wailadmiki Shylla iaka jingioh pynlong iaka Meghalaya Games 2025 ha Jowai

Syllad | The Rising MeghalayaJanuary 23, 2024

Ka lympung ialehkai Meghalaya Games kaba San, ka la poi noh sha kaba kut haka 20 tarik Kyllalyngkot ha PA Sangma, Stadium, Tura West Garo Hills District bad ha kane ka janmiet ba la pynhap pyrda ia kane ka lympung, ka sorkar kala pynbna artad ba ka Meghalaya 2025 ne kaba hynriew, kan long pat ha Jowai, West Jaintia Hills District.

Ha kaba iadei bad kane u syllad ula ioh ka lad ban iakren bad u MLA ka Jowai, u Ma Waildamiki Shylla, uba la wan ban sakhi iaka jingiakob siat khnam (archery) jong ka Meghalaya Games ha Tura.

Kumban shu iathuh ba haka archery ki lahduh ki long ka West Khasi Hills, South West Khasi Hills, West Jaintia Hills bad ka East Khasi Hills. Ha kane ka jingiakop ka West jaintia Hills kala khur takma ksiar haka Recurve Mixed Team event hadien ba kala jop iaka South West Khasi Hills.

Ka West Jaintia Hills ha kane ka kynti kala wan haka kyrdan kaba lai. Ka Lahduh ha kane lympung  bah kadei ka East Khasi Hills, kaba wan ba ar ka dei ka Ri Bhoi.

Ka West Jaintia Hills ha kane ka kynti kala long ka lahduh haka athletic hadien ba kala khur 17 tylli ki takma ba kynthup 8 tylli ki takma ksiar, 4 ki takma rupa bad 5 ki takma rnong.

U ma Wailadmiki haba kren ula ai khublei ia u Myntri Rangbah ka jylla bad ia u Myntri ba dei khmih ia ka tnat Sports ba kin pdiang naka bynta ban pynlong ia ka Meghalaya Games ha u snem u ban wan ha West Jaintia Hills

U Ma Wailad ula ong ba ka jingioh ban pynlong ia kane ka lympung kan dei ka jingkyrkhu ia ki khun samla  jong ka ri lum Jaintia, da kaba u shim syndon ia ka kabu ba un da ai khublei ia baroh ki samla jong ka Jaintia bad khamtam lei lei ia ka kynhun  ba la ialehkai ha ka athletic da kaba ki la lah syndon ban ioh ia ka khusnam lahduh ne ki overall champion ha kane ka jait jingialehkai.

Ula ong ruh ba kane ka jing ioh lad ban pynlong ia ka Meghalaya Games kan nang ai mynsiem shuh shuh ia baroh ki samla ialehkai bad ha ka juh ka por u la ong biang da ka jingioh ban pynlong ia kum kane ka lympung u kyrmen ban ioh ia ka lad ban nang pynbha shuh shuh ia ki ba bun ki ki jaka ialehkai ne wat ia ki madan ialehkai.

Da kumta u Ma Wailadmiki u sngew ba ma u hi shimet u da pdiang shisha da ka mynsiem kaba kmen ia kane ka jingioh ban pynlong ia ka Meghalaya Games ha West Jaintia Hills.

Haba kylli halor ka jingbym pat da don than eh jong ki shlem, ki madan bad ki jaka ban pynialehkai ha kane ka district, u Ma Wailadmi u pynpaw ba kumba ka long ia mynta, lada dei ban pynlong ia kane ka lympung, kum ka district kan dang donkam shibun ki jingdonkam kiba hap ban pynbiang hynrei u kyrmen ba da ka jingiatrei lang khlem pep bad  u la pynkynmaw ba ha ka 23 tarik mynta u bnai, kan don ka jingplie paidbah noh ia ka madan ialehkai Phutbol ha Wahiajer, bad hadien kane, kum u nongmih khmat yn sdang ban iakren noh bad ka tnat sports ba shen la dei pat ka por ban sdang noh ka jingpynkhreh naka bynta ka jingpynlong ia ka Meghalaya Games kaba 6  ha West Jaintia Hills.