Kner jingiarap ka EJDCA sha ki shnong ba jngai na sor bad wer ruh iaki khynnah sha ka kam ialehkai

Syllad | The Rising MeghalayaJune 24, 2021

Ka East Jaintia District Cricket Association (EJDCA) haka 22 tarik une u bnai kala sam marbam sha ki san tylli ki shnong kiba don ha East Jaintia Hills District.

Kine ki shnong kiba sam marbam ka EJDCA ki kynthup iaka Pynthorsale, Lumshyrmit, Lumputhoi, Dienshalalu  bad ka Mookhep.

Ka EJCA hapoh ka jingialam u president EJDCA u Rajiv Bareh kala ai khublei ia baroh ki shnong kiba la pdiang ia ki jingai kiba rit jong ka synjuk.

Kane ka jinghiar sha kine ki shnong kiba kham jngai na ki sor ka long ruh kum ka lad ban pynsngewthuh iaki paidbah halor ka kam ialehkai Cricket.

U Tnebha Phawa, Assistant secretary EJDCA, ula ong ba ka synjuk kala pynshlur iaki shnong bad ki bor shnong ban wer iaki khynnah bad samla ban phai sha ka kam ialehkai cricket kaba dei kawei na ki jait ialehkai kaba plie lad ban ieng hala ki jong ki kjat.