Kner jingiarap ka FKJGP Upper Shillong da ki marbam sha ki 126 tylli ki longïing

Syllad | The Rising MeghalayaJune 15, 2021

Ka Federation of Khasi Jaiñtia and Garo People (FKJGP) Upper Shillong Circle hapoh ka jingialam jong u Kitboklang Nongphlang, president FKJGP Upper Shillong Circle haka sngi Nyngkong kala leit ban noh synniang da ki marbam sha 126 tylli ki long ing kiba la mad ia ka khim khait namar ka jinglynshop jong ka khlam COVID-19 bad ka jinghap ban shongkset na ka jingkhangdam COVID-19.

Kine ki 126 tylli ki longïing ki kynthup ia ki paidbah nongshong shnong jong ka shnong Mawklot, Mawkhan, Mawrashe & Mawnianglah.

Ha kane ka jingsam bam ka FKJGP la iadonlang u Hopewell Kharkongor, president FKJGP Mawnianglah Unit, Kyrshan Langstieh, general secretary FKJGP Mawkhan Unit, Bantei Nongkhlaw, president FKJGP Baniun Unit, Samla Kenny Star Kurkalang, Education Secretary FKJGP Lai Shnong Area Unit nalor ki nongialam shnong kiba la iaadonlang ki kynthup ia u Bah B.K. Tariang, Secretary Shnong Mawklot, Bah Tarius Mawphniang, Rangbah Shnong Mawrashe, Bah Shining Kharkongor Rangbah Shnong Mawnianglah bad kiwei kiwei.

U Kitboklang Nongphlang, President FKJGP Upper Shillong Circle u la ong ba kum ka seng hi kam lah ban noh synniang shibun lane ban leh ia ki kam kiba khraw hynrei ka mynsiem shakri hapdeng ki dkhot jong ka seng ka long ban ai ia u synniang uba rit, hynrei da ka jingieit kaba khraw sha ki paradoh ki para snam jong ka jait bynriew kiba donkam shisha ia ki jingiarap ha kiba kum kine ki khep. Shuh shuh ula pynpaw da kaba ong ha kum kane ka por kaba eh, ki dkhot jong ka FKJGP kim ju shongthait satia bad ki duh thiah duh dem haba ki pyrkhat ia ka jingeh jing jynjar jong ki para doh para snam.