Kner jingiarap ka FKJGP War Jaintia sha ki briew kiba duna bor met bad sha ka dispensary Padu

Syllad | The Rising MeghalayaAugust 1, 2021

Ka Federation of Khasi Jaintia and Garo People (FKJGP) War Jaintia Circle kala kner jingiarap da u khaw sha ki nongshong shnong kiba shah ktah naka jingkhang dam COVID-19 bad iaki briew kiba don jingduna haka bor met haka Sngi U Blei.

Kine ki shnong kiba FKJGP kala synñiang jingiarap ki dei ka Ammutong bad ka Nongbareh Rim. 

Ha kane ka jingsam khaw ka FKJGP la ialam da u president FKJGP War Jaintia Circle Shlur Mukhim, u general secretary FKJGP Reachingson Kongwang haka jingiadonlang kiwei kiwei ki nongialam ba ki dkhot ka FKJGP.

Ha kane kajuh ka sngi ka FKJGP ka la leit jurip ruh ia ka dispensary kaba don ha Padu kum ka jingai mynsiem ia u Dr Arwind Khonglah uba dei u nongpeit ia kane ka jaka ai jingsumar bad ha kajuh ka por ruh uba long kum u Nodal Block Health and Medical ophisar ha ka ka covid committee hapoh sub division.

Ka FKJGP ka ai ka jingiaroh ia une u doktor uba la trei shitom bha miet bad sngi na ka bynta ban iarap ia ki paitbah khamtam ha kane ka jingialeh pyrshah ia kane ka khlam.

 Ki nongialam ka FKJGP kiba la iasyllok bad une u doktor halor ki jingdonkam ban pynbit pynbiang ia kane ka jaka sumar bad kala donkam ban pynkiew kyrdan sha ka PHC kaba donkam. Ka FKJGP kala ai jingiarap da ki PPE sha kane ka sub centre ban iada na kane ka khlam.