Kner jingiarap ka JHDS sa ha Sahsniang ban iakhun pyrshah iaka khlam COVID-19

Syllad | The Rising MeghalayaMay 2, 2020

Ka Jaintia Hills Development Society (JHDS) kala iai bteng ban leh ki kam isynei da kaba kner la ka kti ban ai jingiarap da ki mar bam sa haka shnong Sahsniang, West Jaiñtia Hills District mynta ka sngi Saitjain.

Kane ka jingiarap marbam ka JHDS ka dei kum shibynta ban iarap ïaki para briew ha kaban iasnohkti lang bad ka sorkar ban kyrshan ia kiba duk ba suk ban iakhun pyrshah iaka khlam COVID-19.

Ka JHDS ka dei ka tnad treikam jong ka Jyllaniam, Jowai ban iarap ïa ki briew haka imlang ka sahlang.

Ki marbam kiba la ai ka JHDS ki kynthup ia u Khaw, u Piat bad u Dai sha ki 60 tylli ki longing baduk jong ka Shnong Sahsniang Saitthad bad 60 tylli ki longing baduk jong ka Shnong Sahsniang Kymprup.

Ia kine ki jingiarap la sam mynta ka sngi da u Director ka JHDS u Fr. Manbha Pakem ha ka jingsynrang lang u Coordinator ka JHDS u Bah Denis Kurkalang bad u President ka Catholic Association u Ma Gilbert Sten.

U Fr. Manbha Pakem u la batai shai ba ka JHDS ka dei ka seng tremon sngewbha na ka bynta ka bha ka miat jong baroh ki jait bynriew khlem don ka jingsngew iapher niam lane jaidbynriew. U la ong ruh ba kine ki jingiarap ba ka JHDS kala ai ki dei kum shibynta iasnohktilang bad ka sorkar ban iakhun iaka khlam COVID-19.

U Fr. Pakem u la ban jur ba ki briew ki dei ban pynduh noh syndon ia ka jingianiewbein (Stigmatization) lada jia ba don kino kino ki paradoh parasnam kiba ngat ha une u khniang jingpang, hynrei ki dei ban ia ai mynsiem markylliang ban bud ruh ia ka nuksa ba ka Shnong Pomlakrai ka la leh khnang ban lait na ka jingpur une u khniang jingpang. Ula bynrap ruh ba ki briew ki dei ruh ban pynduh noh ia ka jingsngew iapher niam hynrei ban ia tylli kawei khnang ban lait na kane ka khlam lane ka khlam jong ka jingiap thngan.

u Ma Gilbert Sten ula ai jingpynshai shaphang ka rukom ktah jong une u khniang jingpang bad u la batai shai ruh ia ki katto katne ki lad jingiada ba donkam ba ki briew ki dei ban bud ryntih khnang ban pynduh ia ka jing saphriang jong une u COVID-19.

U Bishop Victor Lyngdoh uba long ruh u President jong JHDS u la ai khublei kyrpang ia ki paid riewngeit jong ka Jowai Diocese kiba la iasnohkti lang lyngba ka jing ia synniang barit jong ki ban ialeh pyrshah ia une u khñiang jingpang. Ha ka juh ka por u la kyntu ruh ia baroh ki nongshong Shnong jong baroh artylli kine ki Shnong ba ki dei ban iatreilang bad ka Sorkar ha ka ban rat dynkhong ia une u Khñiang jingpang da kaba bud ryntih ia baroh ki jingbthah jong ka Sorkar bad ka tnad ka koit k khiah.

Ka JHDS kadei ruh ka seng kaba pyniadi iaki artylli ki Hospital jong ka Sorkar kita ki dei ka Sahsniang PHC bad ka Barato PHC bad lynba kine ka seng ka la ai jingshakri ba paka la palat shiphew snem mynta ia bun tylli ki shnong kiba hap hapor u pud u sam jong kine ki artylli ki PHC.