Kner jingiarap ka JHDS sha ki longiing baduk ha Khahnar bad Muknor

Syllad | The Rising MeghalayaJune 22, 2020

Ka shnong Khahnar bad ka Muknor ki shnong kiba don sha ki jaka kyndong tam ka East Jaintia Hills bad ki nongshong shnong ki hap ban im haka jingim kaba syrtok namar ba sniew palat liam ka surok, hynrei ka Jaintia Hills Development Society (JHDS) ka kynhun treimon sngewbha ka Balang Katholik kaba hap hapoh ka Jyllaniam Jowai kala hiar sha kine ki ar shnong ban kner laka kti jingiarap ban sam da ki mar bam sha ki longiing baduk kine ki shnong.

Kine ki mar bam ki ba synniang ka JHDS ki kynthup ia Dai, Phan, Piat, Shini, Slasha bad Mluh sha ki 245 tylli ki longing baduk haka shnong Khahnar bad Muknor haka 21 tarik U Jylliew 2020.

Ha kane ka jingsam marbam ka JHDS la lam khmat da u Director ka Jaintia Hills Development Society (JHDS) u Fr. Manbha Pakem ha ryngkat ka jingiadonlang u Coordinator ka JHDS u Ma Denis Kurkalang ryngkat bad ki Staff jong ka Childline East Jaintia Hills District.

U Fr. Manbha Pakem u la ong ruh ba ka JHDS ka don ka jingkitkhlieh haka ban ia bynta lang ia ki jingeh ba ki briew ki iakynduh ha kum kane ka por bad u la kyntu ruh ia ki nongshongshong ba kim dei ban ngiet lane shaniah klumar ia ki khubor lamler kiba saphriang ha ki khubor paidbah (social media) shaphang ka Khlam COVID-19, hynrei ban bud ia ki jingbthah ka Sorkar. Ha ka juh ka por u la kyntu ia ki paidbah ba ki dei ia kyrshan lem markylliang khamtam ia ki duk ki rangli bad ban iatreilang bad ki bor Sorkar ban iada na ka jing saphriang une u khñiang jingpang.

Ha shwa ban sam ia kine ki jingbam, la don ka jingialang ba lynkot ba la pyniaid da u Rangbah Shnong ka Shnong Khahnar u Ma. Leo Paslein. La ioh ruh ia ki jingkren lyngkot na u Bah Denis Kurkalang uba la batai lyngkot ia ki katto katne ki lad jingiada ban lait na ka jingsaphriang jong kane ka jingpang ba shyrkhei. Haka juh ka por U Bah Denis u la pynshai ba ka JHDS ka dei ka seng treimon sngewbha kaba trei na ka bynta ka bha ka miat jong baroh ki jait bynriew khlem da niew shiliang ia ki jait niam bapher bapher. Shuh shuh u la pynkynmaw ruh ba naduh ba ka Sorkar ka la pynjari ia ka jingkhangdam ha baroh ka wei ka Ri, ka JHDS ka la dep ban sam ia ki jingiarap haduh 2707 tylli ki longing jong ki 77 tylli ki shnong kiba hap hapoh ka East bad West Jaintia Hills District.

Ha kane ka sngi, ki nongtrei jong ka Childline, East Jaintia Hills District ki la sam ruh ia ki jingiada Khmut (Mask) sha ki 40 ngut ki khynnah jong ka shnong Khahnar. Ka Kong Khankijuh Pala kaba dei ka Center Coordinator jong ka Childline, ka la ai ka jinghikai ia ki khynnah kumno ban saitkti bad ban pyndonkam ia ki mask khnang ban iada na ka jingiabit jong kane ka khlam.

U Ma. Matheus Dkhar nongshong shnong jong ka Khahnar u la ai ka jingkhublei kyrpang iaka kynhun jong ka Jaintia Hills Development Society baroh kawei hapoh ka jingialam jong u Director kiba la pyni shisha ba ki don ka jingkitkhlieh na ka bynta ki duk ki rangli bad u la kyntu ruh ia ki paidbah ba kin nym duh jingkyrmen ha kum kane ka por pynban ki dei ban iasnohktilang bad ka Sorkar khnang ba ka Jylla baroh ka wei kan lait na ka jingshah ktah ha une u khñiang jingpang.