Kner jingiarap ka Khasi Students’ Union da ka kali sha ka jaka sumar ha Amlarem Sub Division

Syllad | The Rising MeghalayaJune 2, 2021

Ka Khasi Students’ Union (KSU) War Jaintia Hills Circle kala kner iala ka kti jingiarap jong daka kali maruti car sha ka Jarain PHC ban shakri ia u paidbah ba pang ba shitom ha kum kane ka por ka saw ka sian na ka jingiakhun iaka khlam COVID-19.

Ka KSU kala aiti ia kane ka kali haka sngi Balang sha ka doktor ba dei khmih iaka Jarain PHC.

“…ban pynsuk iaka leit ka wan u paidbah uba la shah ktah lut baroh na ka jingpynjari curfew ban iakhun iaka khlam COVID-19 khamtam ia u duk u suk ngi la ai sngewbha ia kane ka kali ba kan shakri ia kino kino ki briew kiba donkam kyrkieh iaka kali ban leit sha ki jaka sumar na kane ka PHC kumjuh ban leit phai sha ki iing ki sem jong ki,” la ong u Laitphar Syngkrem president KSU War Jaintia Circle.

Ia kane ka kali la leit ban aiti hapoh ka jingialam ka president jong ka KSU War Jaintia circle Girls Wing ka Ladaplin P Hayong, Lurman B Talang General secretary KSU War Jaintia circle bad Platini Mukhim publicity secretary KSU bad ha ka jingiadon ryngkat ka kong Damera Pohtam dkhot KSU.

Ka KSU kala ong ruh na ka por sha ka por la dawa na ka sorkar ban pynbiang ia ka kali kit nongpang hapoh ka thaiñ, hynrei kam don kino kino ki dak ki shin ba ka sorkar kan pynbiang iaka jingdonkam jong ki jaka sumar ha War Jaintia.