Kner jingiarap ka Seng Kur Lamin sha ki para kur ba shem jingeh na ka khlam COVID-19

Syllad | The Rising MeghalayaJune 3, 2021

Ka seng Kur Lamin Dawki Unit kala kner jingïarap da u khaw bad kiwei ki mar bam sha ki spah tylli ki longïing jong ki para kur kiba shem jingeh hakum kane ka por ba ki duh ïaka bylla sngi namar ka jingkhang khyrdep ban ïakhun ïaka jingpang khlam COVID-19.

Ïa u khaw bad mar bam la leit ban sam haka sngi Palei ha shnong Bakur haka jingïadonlang ki rangbah ka Kur Lamin ba kynthup u President Eraldus Lamin bad Wespar Lamin nalor kiwei kiwei ki rangbah ka Kur.

Ïa kine ki mar bam la sam hapdeng ka jingpynbeit ryntih da kaba bud pyrkhing ruh ïaki kyndon jingbthah ka sorkar khamtam ka jingïeng na jingjngai kaba shi meter iwei na iwei ne ka Social Distancing.

Ïa u khaw la sam mar 25 kilo shi longïing nalorkata la sam ruh ïaka umphniang, dai, phan, piat bad ka mluh.

Halor kane ka jingleh bha jong ka Kur Lamin ki nongïoh myntoi ki la pynpaw ka jingsngew nguh bad ïaroh ïaka Kur kaba la kloi ban ïarap ïaki hakum kane ka por kaba ka ri bad ka Jylla ka mad ïaka jingtynjuh jong ka jingpang khlam.