Kner kti jingïarap ka Apollo Tyres sha ka Ladthadlaboh Dorbar Shnong

Syllad | The Rising MeghalayaAugust 21, 2019

JOWAI: Ka Apollo Tyres kala ai jingïarap da ki jersey ïalehkai football sha ka Ladthadlaboh Dorbar Shnong, kaba ïalehkai mynta ka aiom haka kyrdan 1st Division Football kaba pynïaid da ka West Jaiñtia District Sports Association (WJDSA).

Ïa kine ki jersey ne ki sopti ïalehkai football ka Apollo Tyres kala aiti sha ka Ladthadlaboh Dorbar Shnong haka sngi Balang haka jingïalang kaba lyngkot kaba long ha ophis jong ka dorbar shnong.

Ïa kane ka jingïalang la pynïaid da u Ma FC Chyne, Chairman ka Sports Committee Ladthadklaboh haka jingïadonlang u Area Manager jong ka Apollo Tyres u ma Embhah Dkhar, u Ma Blooming Lytan Dealer jong Apollo Tyres (Lytan Automobiles), u Acting Waheh Shnong, Ladthadlaboh Dorbar Shnong u ma Russel Nongrum, Symbud Waheh Shnong u Ma S Bareh, u General Secretary Ladthadlaboh Dorbar Shnong u ma ABM Shullai, u Sports Secretary Ladthadlaboh Dorbar Shnong u ma Helpme Shylla bad kiwei kiwei ki samla ïalehkai ka shnong.

U Area Manager jong ka Apollo Tyres u Ma Embhah Dkhar, ula ong ka jingthmu jong ka company ban synñiang da kine ki sopti jersey kadei kum shibynta ban ai mynsiem bad pynshlur ïaki nongïalehkai football ka Ladthadlaboh SC. Ula ong ba ka company Apollo Tyres ha kylleng ki ri ka pyrthei ka don bynta ban kyntiew ïaka kam sports bad kane ka dei ka sien kaba nyngkong ba kila synniang sha ki bor shnong ha kane ka thain.

“Watla ka jingai ka company kalong kaba rit, nga kyrmen ba phin pdiang hun ïa kane ka jingai ka jongngi bad kyrmen ba ngin nang ïatreilang shuh shuh nangne shakhmat,” la ong u Area Manager ka Apollo.

U Waheh Shnong ka Ladthadlaboh Dorbar Shnong u ma Russel Nongrum haba kren ula ong ba ka dorbar shnong, ka jingpynlut jong ka haka kam sports kalong kaba bun bad ka shem jingeh bha ban pynmih pisa ban kyrshan ïaka kam ïalehkai ki khynnah bad ki samla ka shnong haka kam ïalehkai. Ula ai khublei ïa u Area Manager ka Apollo Tyres bad dealers ha Jowai ïaka jinglong lakloi jong ki ban kyrshan ïaka shnong bad kyrmen ba kane ka company kan nang theh ki lad jingïarap jong ka na ka bynta ban kyrshan ïaka kam ïalehkai ka Ladthadlaboh.

U General Secretary Ladthadlaboh U Ma ABM Shullai ula ong ba ka dorbar shnong katkum ka jinglah ka bor kam ju khang lad ïaki khynnah bad ka samla ka shnong ban ïashimbynta haki kam ïalehkai khnang ba kin lah ban kiar na ki jingmlien kaba sniew kiba la jyllei haka imlang ka sahlang, hynrei ka jingeh pat kalong ba ka shnong ka ïakynduh kadei haka liang ka pisa pilain. Ula ai khublei ïaka Apollo Tyres bad uba buh ka jingkyntu ba kan kner shuh shuh ïaka jingsynñiang sha ka shnong ban myntoi ki khynnah bad samla ïalehkai.