Kner kti jingiarap ka JSM ha ki bun tylli ki shnong ha East Jaiñtia Hills ban iakhun COVID-19, sngewnguh ki bor shnong

Syllad | The Rising MeghalayaApril 26, 2020

Ka Dorbar Shnong Khliehmyntriang ka dap da Ka jingkmen bad sngewnguh shikatdei eh ia ka seng Jaintia Students’ Movement (JSM) kaba la pyni iaka jinglong la kloi ban synniang bad ban iarap ïaki longïong ba duk da u khaw sha ka shnong Khliehmyntriang haka 23 tarik une u bnai.

U Waheh Shnong Khliehmyntriang u ma Plied Dkhar u la ong ba kane ka jingai khaw sngewbha ka JSM ka long Ka jingkyrkhu ia ki nongshong shnong kum ha kine ki por ba lockdown ka sorkar na ka bynta ban ialeh pyrshah ia Ka jingsaphriang u khniang Coronavirus namar ki nongshong shnong kim ioh shuh ban trei ban ktah, kaba la ktah bha iaka lada kamai kajih jong ki bad ban pyndap pynbiang iaka jingdonkam haki iing ki sem jong ki.

Ka Shnong Khliehmyntriang ka kitbok kit rwiang ia ki nongialam bad ki dkhot ka seng ba kin ioh Ka met ka phad ba koit ba khiah khnang ba kin lah shuh shuh ban shakri ia ki paidbah.

Haka juh ka por ka shnong Pamrapiathlu ruh kala pynpaw ka jingsngewnguh iaka JSM kiba la kner ka kti jingiarap jong sha ki paidbah nongshong shnong.

“Ngi sngewkmen shuh shuh ba don ki sengbhalang kum ka JSM, kaba la mih shkhmat ha kum ha kane ka por ban kner iala ka kti jingiarap sha ki nongshong shnong jongngi,” ong u Secretary Shnong Pamrapaithlu u Ma Solomon Dkhar.

Ka Jaintia Students’ Movement (JSM) kala sam marbam ha ka 25 tarik une u bnai ha katei ka shnong bad bun tylli ki longïing kila ioh jingkyrkhu, la ong u Secretary Shnong Pamrapaithlu bad kane kala iarap shisha iaki nongshong shnong khmatam kiba ym don card ration.

Ka khubor kaba iohlum baka JSM kala hiar ban iarap sha bun tylli ki shnong ha East Jaintia Hills bad kine ki shnong kiba la ioh jingiarap ki kynthup iaka Mookhep, Dkhiah East, Iongkaluh, Musniang Rim, Ladrymbai, Dienchynrum bad kiwei kiwei nalor ka Khliehmyntriang bad ka Pamrapaithlu.

Ka JSM kan hiar sha kiwei kiwei ki shnong kiba shah ktah na kane ka lockdown, bad ka dang ap iaki jingbit na ka bor synshar district jong ka East Jaiñtia namar ba ka don ka jingpyrkhing ban ai jingirap sha ki paidbah ban iada na ka jingsaphriang ka khlam COVID-19.