Kner kti jingïarap u CE barim ka tnad Water Resources sha ki longïing ba duk

Syllad | The Rising MeghalayaApril 23, 2020

U sahep sorkar ba shongthait uba ju bat kum u Chief Engineer ka tnad Water Resources Department ka sorkar jylla, u ma K. Dikyl Phawa u la kner ia la ki kti ban iarap ia ki palat spah ki longing kiba duk ha ki lai tylli ki dong jong ka shnong Ialong, West Jaintia Hills haka sngi Balang.

U ma Phawa u la mih sha khmat ban iarap kyrpang ia ki para kur Phawa kiba don ha katei ka shnong kiba la shah ktah jur na ka lockdown ban ialeh pyrshah ia ka jingsaphriang u khniang jingpang COVID-19.

U ma Lehbha Phawa uwei na ki riew rangbah ka kur Phawa ha katei ka shnong u la ai khublei ia u ma Dikyl Phawa uba la mih shakhmat ban iarap ia ki para kur kiba duk kiba hap ban mad ia ki jingeh na ka daw ka jingpur ka khlam COVID-19.

“Ki la don kumba shispah tam ki longing kiba la ioh jingmyntoi na katei ka jingiarap kaba dei da u khaw haduh 2500 kg”, la ong la ong u ma Lehbha Phawa.

Na ka liang utei u sahep sorkar ba la shongthait u la kyntu ia ki nongshong shnong ba ki dei ban buh ryntih ia ki kyndon jong ka sorkar bad ka tnad ka koit ka khiah – ka Social Distancing, ban deng ia ki Mask bad kumjuh ban lehkhuid da kaba sait ia ki kti bun sien ha ka shi sngi ban ialeh pyrshah ia utei u khniang jingpang.