Knieh ki nongrep Soh Trun ka jylla Meghalaya wat ia  ki iew bar ri

Syllad | The Rising MeghalayaJuly 29, 2023

Hadien ka jingjop ka jingshalan ia u Soh Niamtra ba la tip kum u Khasi Mandarin  ha u snem ba la dep, na ka liang ka tnad ka Rep ka riang bad Farmer’s Welfare jong ka sorkar bad ruh ka Meghalaya Basin Management (MBMA) dang shen ka la plie ia ka lad khaii kaba haduh 1.3 ton u Soh Trun sha ki ri Middle East.

Kane ka long shi bynta jong ka jingpyrshang ban weng noh ia ka jingiajngai hapdeng ki nongrep bad ki iew bar ri kiba heh. U Soh Trun na Meghalaya la dei ha kylleng ki dukan heh jong ka Dubai, Kuwait, Sharjah bad kham kongsan ka long ba bun na ki nongrep jong ngi, ki la ioh ban mad mynta ia u soh ka jingtrei shitom palat arshah ka dor kaba ki ju die baroh shi katta.

Kane ka jingpyrshang ka la wanrah bad long ruh ka jingiarap ia ki nongrep ban ioh ia ka iew kaba neh bad kaba biang kaba pyniasoh lang bad ka iew ha ka ri. Dang ha u snem ba la dep, kumba 40 ton u Soh Trun la dep ban shalan sha kawei ka jaka shalan soh kaba don ha Karnataka bad nangtei pat kin sa shalan sha ki ri Europe bad ki iew jong ka North America.

Mynta u snem 2023, katei kajuh ka jaka shalan ka la lah ban pynmih ruh sa kawei ka jaka treikam da ka kali ne ka mobile processing unit, ha Umdihar IVCS ka Umdihar, Ri Bhoi District khnang ban dup lah pynmih kham bun bad kumta haduh 23 ton u Soh Trun la lah ban pynmih da katei ka unit tang ha ka taiew ba nyngkong jong ka jingtreikam jong ka. Kitei ki processing unit ki donkam ia u Soh Trun ba khia shi kilo shaneng bad kim pdiang ruh ia ki Soh Trun kiba rit. Kumta ha ka por kheit soh, baroh kawei ka jaka rep la kheit lut ia ki na ka bynta ban die bad kumta tang ia kiba heh pat la lah ban buh na ka bynta ban die (Grade A) sha kitei ki processing unit.

Kane ka la pynlong pat ia ki nongrep ban sah shibun ki Soh Trun kiba kham rit (Grade B). Kumta namar ba ka dei ka aiom ba u Soh Trun u ih, kumta ia kitei kiba kham rit la die noh ha ka dor kaba kham tad bad katba lah dor. Ban iarap na ka bynta kine ki soh kiba rit, na ka liang ka sorkar ka la wad shuh ki lad ki lynti kumno ban pyniasoh bad ki nongdie bad kumta dang shen ka la ïoh ban ïatehlok bad ka Reliance Retail store kiba don ha kylleng ka nongbah Guwahati ban die ia kitei ki soh na Meghalaya. Kumta, da katei ka sienjam, ki nongrep mynta ki la ioh ban die ha ka dor kaba heh arshah naka dor kaba ki ju die.

Kum ban shu kdew hangne ba u Soh Trun na kane ka jylla u jur bha ha ka jingdon ka shini (brix value of 16-18) bad kham duna ka jingjew. Ïa kitei ki Soh Trun ha ka jylla la ju rep khlem pyndonkam da kino kino ki kynja dawai, bad kane ka pynlong ban pynduna ia ka jingdon ki kynja khniang ha u soh.Dei na kane ka daw kaba pynlong ia ki ban lah ban pyniaid iew wat sha ki iew kiba heh sha barri bad ruh ha ki iew ha ka ri.

Baroh shi katta  ia ka iew la bat da ki nongkhaii pdeng lane kita ki middlemen kiba ju ohdor bha ia ki nongrep da kaba siew lypa ïa ka mar rep shwa ban kheit ïa u soh. Kumta ki nongrep namar kim donlad ban khaii shabar bad donkam ka pisa ha shwa ban kut ka samoi bad ruh shwa ka samoi long skul da ka jingbym banse ki la shim lypa ia katei ka pisa ba ju ai kitei ki nongkhaii pdeng 

Hadien ba la iohi ia ki jingeh ba ki ishu ba ki nongrep ka jylla ki mad, na ka liang ka sorkar jylla ka la trei borbah ban plie lad plie lynti khnang ban pynsuk ia ki paidbah ha ki shnong ki thaw. Kine ki jingpyrshang suki suki ki sdang ban wan dur. Ka sorkar ka la trei borbah ruh ban lum lang ia ki nongrep bad thaw ïa ki kynhun jong ki nongrep ne kita ki farmer cooperative ne ki farmer producer organisation (FPO) ha baroh kawei ka jylla bad mynta ki la don palat 350 tylli ki kynhun kiba la dep ban thaw ha kine ki lai snem ba la dep.