KO AKOR KHASI

Ko Ri Khasi ba ieid jong nga,
Balei kumne ïa pha ka jia?
Shaei kito ki por ki phet,
Mynba akor ka dang shong khet?

Nga ju ïohsngew ha Ri Khasi,
Mynba danglung u bnai ka sngi;
Jingsuk jingkmen ka shlei kyrhai,
Kat shaba leit, kat shaba phai.

U lyoh ba dum kynsan u wan,
Katba jingstad nangkiew kyrdan;
U briew u sdang ban klet ï’U Blei,
Ban mareh thong bad ka pyrthei.

Hangne akor la nang ringsdot
Ia spah pyrthei ba ngi lalot;
La khun la kti ngim don por shuh,
Ban sneng ban kraw ban pynsgewthuh.

Ki khun ïa la ki kmie ki kpa,
Da ktien ba khor ki pynphai nia;
Sangsot ki kmie ki kpa bapli,
Shu jaw ummat miet la bad sngi.

Tang jingkajia ha shnong ha thaw,
B’la kiew skong jingsngewmeng sngewkhraw;
Jingburom markylliang la duh,
Jingsngewrit ruh baroh la duh.

Shano kan poi ka jaidbynriew,
Lada ngim long kiba tipbriew;
Kumjuh ruh kiba tip ï’U Blei,
Katba dang im ha sla pyrthei.

Ko Ri Khasi kyndit bynriew!
Ia pha la tyllep da jingsniew!
Akor burom la shong sator,
Ha nongkyndong kumjuh ha Sor.

Da sur myllung nga pyrta jam,
Phet ïap noh na kane ka khlam!
Ko Ri Khasi baieid jong nga,
Ko Ri b’la pun b’la kha ïa nga.

Ka Ri jong ka burom akor,
Ba la ju tip naduh mynnor;
Sa shisien pat to ngin wanrah,
Ïa nam burom kaba la jah.