Kop u Nehemayah ba dang khlain ka Congress ha man la ki block ha Rilum Jaintia

Syllad | The Rising MeghalayaApril 13, 2022

U Nehemayah Tyngkan, u vice president jong ka Meghalaya Pradesh Congress Party (MPCC) ula ong baka Congress ha rilum Jaintia ka dang khlain bad ha manla ki block committee ka Congress ka don iaki dkhot.

Ia kane u Nehemayah ula ong haba kren bad ki nongthoh khubor haka sngi ba Balang hadien ka jingialang ban pynkhlain iaka party ha rilum Jaintia

“Ka jingialang kaba la pynlong mynta ka sngi ka dei na ka bynta ban pynbeit iaka rukom treikam jong ka party,” la ong u Nehemayah uba la dep pynbna ban iakhun biang iaka elekshon MLA 2023 na 4 Mowkaiaw.

“Ka Congress hi kam pat jah bad ngi dang khlain ha man la ki block ha baroh ar district, ka West Jaintia Hills bad East Jaintia Hills District,” la ong u Nehemayah.

Ula kynthoh ruh ia kane ka sorkar MDA halor ka jingpynheh tyngam ban pynlong iaka Cabinet on the Move ne ka Cabinet kaba iaid shakhmat ha manla ki district, pynban kane ruh kala kut tang haka jingkular. “Shano kata ka jingpyniajan ia u paidbah bad ka sorkar,” la kylli u Nehemayah bad bynrap ruh ba haduh mynta ka jingthmu ban wanrah iaka mini secretariat ym don satia kino kino ki dak ki shin.

“Kane ka sorkar kala khlei iaka juban lak kumban leh noh bad wanrah iaki kam pynroi mynta mynta pynban kala kut tang haka jingkular,” la ong u Nehemayah.

Ha kaba iadei bad ki ñiut ruh haduh kane ka sorkar kala kut tang haka jingkular bad haduh mynta kam lah satia ban pynkhuid ïaki ñiut naki iew ha Jowai.

Kane ka jingialang jong ka Congress ha ophis treikam jong ka West Jaintia Hills District Congress Committee kila iakren na ka bynta ban pynkhlain bad ban sdang iaka jingpynrung dkhot ha kylleng ka rilum Jaintia.

Ha kane ka jingialang la donlang u Erwin K Sutnga Secretary MPPC, Adrian L Chyne Mylliem president MPYC, Andrew Shullai MDC, Rikut Parein secretary WJHDCC bad kiwei kiwei.