Krem Mawjymbuin: Yn ym ailad ki bor District  Ri Bhoi ia ka Seng Hindu ban iakhih ha u pud u sam

Syllad | The Rising MeghalayaDecember 24, 2024

Ki bor pyniaid district ka Ri Bhoi kaba kynthup ia ki bor pulit ka ha ka 23 tarik Nohprah ki la pynpaw da kaba shai ba kin ym ailad satia ia ka kynhun shit niam Hindu, ka Kutumba Surakshya Parishad (KSP) ba kan ioh lad ban pynlong ia kano kano ka jingiakhih ha ka thaiñ Byrnihat kumba ka la byrngem ban khang ia ki kali ha ka 24 tarik Nohprah 2024.

Lah ban kdew ba kane ka kynhun seng shitniam Hindu ha kine ki khyndiat sngi ba la dep ka la byrthen ban pynlong da ka jingiakhih paidbah ha ka thain Byrnihat bad Khanapara, Ri Bhoi District lada ka sorkar jylla kam ailad ban pynlong ia ka jingmane blei hapoh ka krem Mawjymbuin kaba don ha Mawsynram.

Nalor kata kane ka kynhun ka la byrngem ruh ba lada ka sorkar jylla Meghalaya lyngba u Myntri Rangbah ka jylla kim lah ban shim ia ka rai ban ailad ban mane blei ha kane ka krem, ka kynhun jong ka KSP kam banse ban shim da ki lad jingiakhih ba tyngeh.

Byrthen khangdam ka HNLC ia ki Temple Hindu lada iakhih ka KSP ban dawa lehniam ha krem Mawjymbuin

Haba kren bad ki lad pathai khubor u Deputy Commissioner ka Ri Bhoi District u Abhilash Baranwal bad u Superintendent of Police, u V.S Rathore, ki la pyntip ba ki bor pyniaid district ki la shimkhia ban peitngor halor kane ka jingbyrngem jong ka kynhun KSP bad ban pynjur ia ka jingpahara ha kine ki thaiñ ban pynneh ia ka shongsuk shongshngain bad khamtam ruh ban pyntikna ba kan ym don kano kano ka jingpynthut ha kaba iadei bad ka jingrakhe Khristmas.

Nalor kata la pyntip ruh ba ki bor district ka Ri Bhoi ki la dep ruh ban iakren bad ki bor district bad pulit ka Kamrup Metro ban peitngor lang halor katei ka jingthmu pynlong jingiakhih jong ka KSP la ka dei ha ka liang u pud u sam ka Assam ne Meghalaya bad ban ym ailad da leilei ia kano kano ka kynhun ban pynlong ia ki jingiakhih paidbah ha kine ki thain.