Kren u CEM Thombor Shiwat halor ka jingkynnoh pyndonkam bakla ia ka pisa ka JHADC da ka VPP

Syllad | The Rising MeghalayaJuly 30, 2024

U Chief Executive Member (CEM), Jaintia Hills Autonomous District Council (JHADC), u bah Thombor Shiwat u la jubab ia ki jingkynnoh ba dang shen jong u President ka Voice of the People Party (VPP) u bah Ardent Miller Basaiawmoit halor ka jingpyndonkam bakla ia ka pisa jong ka konsil.

U bah Shiwat u la kyntait mardor iaka jingkynnoh u nongialam ka VPP bad pynrem iaka jingkren laitlan bad kren tohmet jong u Bah Ardent pyrshah ia u haka jingialang kaba long haka 26 tarik Naitung ha Iawmusiang, Jowai.

U bah Shiwat u la pynpaw ia ka jingsngew sngewkhia halor ki jingkynnoh pyrshah ia u bad u la ong, “Ka VPP kam don hok ban tuklar ha ki kam pisa jong ka konsil.”

U la buh jingkylli ia ka jingdawa jong ka VPP ban panmap, da kaba ong, “Balei nga dei ban panmap na ki paidbah? Ngam shym la leh ei ei kaba bakla. Ki jingkynthoh jong ka VPP ki mih na ka jingbym sngewthuh jong ki ia ka pisa kaba 20 klur tyngka.”

“Katkum ka jingsngewthuh jong nga, bad ka jingiohi bad ka jingtip ka jong nga kine ki VPP ki sngew iamrem ha ka jingiadei bad ka pisa kaba 20 klur ia kaba ma ki kim tip eiei ruh iaka jingioh pisa ka jong ngi, dei hadien ka jingwan jong ki ban iakynduh bad nga ban wad jingtip shaphang ka lak ka klur ka konsil,” la ong u CEM.

U Bah Shiwat u la pynshai ba ka sorkar ka la pyllait sa 20 klur tyngka sha ka JHADC nalor ka 30 klur tyngka, kaba ka VPP kumba ka paw ka la sngewthuh bakla. U la pynskhem, “Kane ka pisa ka dei na ka bynta ba ka konsil kaba dei ka bhah na ki mar poh khyndew ban pyniaid iaki kam ki jam ka council bad ban siew iaka tulop ki nongtrei.”

Haba kren halor ki jingkynnoh na u bah Damewanhi Rymbai, u Bah Shiwat u la kyntait bad ong ba kam don kano kano ka jingleh bakla da kaba bynrap “U Rymbai u la kynnoh ia nga, ba nga la pyndonkam bakla ne buhrieh ia ka pisa kaba T. 20 klur, kaba long kaba bakla. Ka pisa ka long kaba biang bad la khein bha. Ka pisa jong ka council ka long kaba shai bad ym shym la pyndonkam bakla, hynrei balei ngan hap ban iathuh ia u kiei kiei ba ka konsil ka ioh, da ngi ioh katno katno ruh ki kim don hok ban tip kadei ka pisa jong ka konsil kam dei ka pisa jong ka VPP.”

“Nga dawa ban pan map na u Damewanhi Rymbai ka dei namar ka jingkynnoh jong u pyrshah ia nga, ba nga pyndonkam bakla iaka pisa ka konsil bad pynthoh bria ia nga. Kat ka pisa kaba wan kam rung haka account jong nga, ka pisa ka konsil ka leit sha ki nongtrei bad ki kam jong ka ophis.”

U bah Shiwat u la pynrem ruh ia u bah Ardent halor ki jingkren bym don nongrim ka jong u. “Kum u CEM barim, u Bah Ardent u dei ban tip kumno la mang bad pyndonkam ia ka pisa da ka council. Ki jingkynnoh jong u ki long kiba khlem nongrim,” la ong u bah Shiwat.

U la ban biang ba ka pisa T.20 klur ka dei ka bhah jong ka konsil na ki minor mineral la pyndonkam hok ia ka na ka bynta ki jingthmu ba kyrpang kynthup ia ka tulop jong ki nongtrei.

U Bah Shiwat u la ther tyngeh ia kine ki nongialam ka VPP halor ki jingkren bakla jong ki bad ula pan ia ki sakhi sabut halor ka jingpyndonkam bakla jong u. “Lada jia ba kane ka pisa ka duna ne pyndonkam bakla balei yn leit thad lane pynbiej ia u paidbah u bym tip eiei ia kata ka rukom ioh ne duh pisa bad rukom pyllut pisa, balei ym ai syndon ia nga da ka FIR balei ym pynkem syndon da u pulit, lada shem ba nga la leh bakla ne pyndonkam bakla iaka pisa jong ka konsil,” buh jingkylli u CEM.

U CEM ula ong shuh shuh “Ngi khlem shong sngi ngi iai trei hynrei ka jingkynnoh ka jong u bah Ardent da kaba ong ba ki don ki briew na ka ophis District council ba leit maham iaka treasury ophis, kata ruh kadei kaba bakla ngim ju leh kumta, ngi tip iaka kam jong ka treasury, hynrei dei ma ki kein kiba wan iakynduh ia nga haba nga iathuh iaki ia kata ka jingshisha ba ngi nangne ngi la pyndep iaki jingdonkam bad kaba sah kadei na ka treasury. Dei ma ki ba leit ban maham bad ujor iaka treasury ba dei ban leh hynrei ki kynnoh pynban ia ngi. Ngim lah ban pdiang ia kane ka jingkren tang ban shu pynbiej bad pynthame ia u paidbah”.

U CEM JHADC ula kren ia kane hadien ka jingkren u bah Ardent haka jingialang ka VPP ha Jowai halor ka shithi kaba pyntip na u Joint Secretary ka tnad kam khlaw jong ka sorkar Jylla bah SS Syiemlieh ba la pyllait iaka bhah jong ka JHADC, kata 20 tarik Jylliew 2024 sha u PCCF ba la pyllait iaka bhah ka konsil na ka minor mineral Tyngka 20 klur 12 lak 57 hajar 306 jong u snem 2023-24.