Ktah jur ka khlam COVID ïa ka pliang ja ki rang ïalehkai klob Phutbol

Apporlet ShabongJune 15, 2020

Ka jingwan ban lyngshop jong ka khlam jingpang Covid-19  ne Coronavirus, ka la ktah jur bha ïa ka pliang ja jong ki rang ïalehkai klob phutbol jong kane ka jylla.

Lada ïa nujor bad ki snem ne ki samoi ïalehkai ha ki snem kiba la dep, tang shu la poi u bnai Lber shaneng, kiba bun na ki rang ïalehkai Phutbol jong ka jylla, ki juh ioh ïa ka kabu ba kin ïa khlieh ïa la ka dor ne ia ka bainong ka jong ki bad ki klob ne ki kynhun ïalehkai phutbol jong ka nongbah Shillong kiba juh ïashim bynta ha ka lympung ïalehkai bapher bapher bapher bapher ba juh pynlong ïa ka da ka Shillong Sports Association, kaba kynthup naduh ka Shillong Premier League, ka U-18 Premier League, First, Second, Third bad Fourth Division.

Pynban mynta pat ka snem, naduh ba ka sorkar kmie na Delhi ka la pynjari ïa ka jingkhang dam ne ka lockdown, ki kam ïalehkai ha ka ri hi baroh kawei la rai ban pynsangeh lut noh shi syndon ïa ki, kampher ba dang shen ba wat na ka liang ka ka tnat kam pohïing ka ri, ka la wan shakhmat ban kham pynjynsur noh ïa ki hukum kiba la pynjari da kaba la shah ne ailad ïa ki non contact sports, ba ki lah ban sdang ban ai noh ïa ki prokram ïa kilan ki jong ki da kaba bud ryntih ïa ki kyndon ba la pruid dak.

Hynrei naka bynta kwei pat ki jingïalehkai ba dei kiba ïa takhuh para met ne ki contact sports, ïa kine haduh mynta ka sorkar kmie lyngba ka tnat kam pohïing ka ri bad ka tnat ïalehkai ki dang ïai bteng ba kin khang dam shwa ïa ki ha ka ri hi baroh kawei.

Mynta lada yn ïaphai biang sha laka jong ka jylla haba ïadei bad ka pliang ja ïa ki rang ïalehkai klob Phutbol, la sngewthuh ba ka samoi ïa  soi kontrak ïalehkai hapdeng ki klob bad ki rang ïalehkai ka  long haduh ba kut ka samoi ïalehkai jong ka SSA.

Ka kontrak ïalehkai ba ki player ki sdang ba kin ïoh ban ïa kamai na ki klob ka dei hadien ba ki klob ki la dep shwa ban ïashim bynta ha ka jingsoi ïa ka Inter Club Transfer bad ka SSA bad hadien kane, ka jingsiew ïa ka bainong ïalehkai ïa ki player ka sdang naduh ka sngi ba u coach u la lum lang ïa baroh ki player ban sdang ban ïa kilan kum shi bynta ka jingpynkhreh ban aireng ha ki lympung ïalehkai jong ka samoi ka SSA kaba lah ban long haduh ka taiew ba hapdeng jong u Nohprah ne don pat ki klob kiba thmu ïashim bynta sha ki lympung jong ka I. League, ka kontrak ïalehkai ka jong ki ka ïai bteng haduh ban da kut jong ka samoi ïalehkai.

Ynda haba la kut ka samoi ïalehkai jong ka SSA, ki rang ïalehkai klob Phutbol ki juh bteng ïa ka kamai ka jong ki da kaba ki pynïasnoh pat sa bad ki kynhun shimet ne ki team shnong ba kin ïashim bynta ha ki tamasa ïalehkai Phutbol ba juh long ha ki nongkyndong ba kum ki Invitation Football bad kiwei kwei, kaba ka song pisa ïa ka kynhun ba ïoh rah ïa ka nam lahduh ka dei kaba heh.

Hynrei kine ruh ki tamasa ïalehkai mynta hi ka samoi la I shem jingeh ba kin lah ban pynlong, katba kam pat don satia ki dawai dashin kiba lah ban pynkoit ne ban ïada ïa ka khlam jingpang jong ka Covid-19.

Hynrei mynta pat ka  samoi (snem), ka SSA kam shym la lah ba kan pyndep ïa ka inter club transfer namar ka rai khangdam ne ka lockdown ka dang ïai bteng haduh kine ki sngi kiba mynta, da kylla kane pat ka la ktah ïa ka pliang ja jong ki rang ïalehkai klob Phutbol ka jylla, kaba bun na ki nongïalehkai ki la mad shisha ïa ka jingeh katno tam lei lei ïa kito ki bym don ki kam ki jam ba tikna kum ka kam sorkar, hynrei kiba ïarap ban kyrshan lem ïa la ka ïing ka sem da ka bainong ïalehkai Phutbol  ba la ïoh na ki klob.