Kudengrim ka jaka shangkai kaba thymmai ha Jylla

Syllad | The Rising MeghalayaJanuary 27, 2019

AMLAREM: Ka Kudengrim, ka shnong kaba hap hapoh Amlarem Sub-Division, West Jaiñtia Hills District kan long sa kawei na ki shnong ban khring ïaki nongwan jngohkai pyrthei.

Kane ka shnong ka jngai tang 50 KM na Jowai bad 25 KM na Amlarem ban ïaid lyngba ka surok ban poi sha ka shnong Padu Nongbareh.

Kane ka shnong ka don ka jingkieng jri ba ar mala kaba la shna pynbha da ki nongshong shnong, ka don ka kshaid kaba itynnad ha ka wah Amlamar, ki ïing halor ki dieng ba shna pynbha da ki skhen ki siej bad ki lynti ïaid kjat da ki skhen ban poi sha ka kshaid Amlamar. Ka don ruh ka lynti ïaid kjat ba la oh shrong haki maw, ka jingkieng doi.

U Waheh Shnong Mondew Pohtam ula pynpaw ka jingkmen halor ka jingtylli ka shnong ban ïatreilang naduh khynnah, samla bad ki rangbah ban pynlong ïaka shnong kum kawei na ki jaka jngohkai pyrthei.

“La tei ïa ka jingkieng khlem da pyndonkam wat tang uwei ruh u  prek bad ïa ki ïing halor dieng da kaba pyndonkam da ki siej, kane ka jingtei kan wanrah ka jing khring  ïa shibun ki nongjngohkai bad nga kyrmen ruh ba kan pynmyntoi ïa ka shnong ha kaba bun ki liang”, la ong u Mondew Pohtam bad bynrap ba U Myntri Rangbah ka Jylla u Conrad Sangma un sa wan ban plie ïa kane ka jaka jngohkai ha kane ka shnong ha ka 31 tarik u Kyllalyngkot.

Shuwa ban poi ha kane ka shnong poi shuwa ka Nongbareh, kaba paw nam haka jingdon ka jaka kyrpang ki dohkha ki “Chocolate Mahseer Fish” bad ka jingkieng jri bad kiwei.Ki don ki krem ba suk ban rung ban mih bad ka shad Rongkusi kaba paw bha ha katei ka thain.

Ka don ruh ka khana ba haka por u Kiang Nangbah wat hadien baka sorkar phareng kala dep sdien phasi ïa u, hynrei ka jingïakhun pyrshah bad u dohlieh hakatei ka thaiñ ka ïaid beit.