Kular ka bor District West Karbi Anglong ban iatreilang na ka bynta ka jingiaid beit ka elekshon JHADC

Syllad | The Rising MeghalayaFebruary 19, 2025

Ka bor District jong ka West Karbi Anglong, Assam ki la pynthikna ban ai ka jingkyrshan ba pura bad ban iatreilang bad ka bor District ka West Jaintia Hills, ban pynthikna na ka bynta ka jingpynlong ia ka elekshon sha ka JHADC kaba iaid beit ha ki thain khappud jong kine ki ar District ka Assam bad Meghalaya.

Katkum ka jingpynbna da ki bor District na ka liang ka Tnad pulit ka Meghalaya ka pyntip ba kan pynlong ia ka jingpeitngor ha kito ki jaka rung jaka mih ha ki bynta khappud bad ban pynkhlain ruh ia ki bor pahara na ka bynta ka sngi thep vote.

Nalor kata la pynlong ruh ia ka jingialang khappud ha ka kyrdan jong ki DC bad SP hapdeng kine ki ar District ha kaba na ka liang ka bor District ka West Karbi Anglong ka la kular ban ai ka jingiarap katba lah halor ki kam shongshngain nalor ka jingiatreilang hapdeng ki bor pulit ha ka sngi thep vote.

Lyngba u kyrwoh la pyntip ruh ba ka Tnad pulit ka Meghalaya kan phah haduh 550 ngut ki heh pulit bad ki bor pahara ban pynthikna na ka bynta ka jingpynlong ia ka jingiathep vote kaba iaid beit iaid ryntih na ka bynta ka elekshon sha ka JHADC ka ban long ha ka 21 tarik Rymphang ha West Jaintia Hills.

Ha kaba iadei bad ki jaka thep vote ne polling station ba la ithuh kum kiba don jingma da ka tnad pyniaid elekshon ha ryngkat ka jingiasyllok bad ki Sector Officer bad Pulit, haduh 48 tylli ki polling station hapoh ka District la pynhap kum kiba don jingma. Yn phah shuh shuh ia ki bor pahara ha kito ki polling station kiba don jingma ha kaba yn kynthup lang ruh da ka tnad pahara Quick Response Team ki ban don ha ki jaka kiba kongsan.

La pyntip ruh ba kum ki lad jingiada la pyntreikam ia ki sienjam kum ka jingleit buh ia ki tiar siat ba don laisen, ki jingkhynra, ka jingteh lakam ia ki nongpynthud, ka jingtalasi, ka jingiaid pahara bad kiwei pat ki sienjam bad kat haduh mynta kam pat shym la don kano kano ka jingpynkhein ia ki kyndon jong ka MCC bad ym pat shym la register ia kino kino ki case kiba iadei bad ki jingpynkhein ia ki kyndon ain pyniaid elekshon.