Kular ka Director ba kan leit jurip iaka BITE East Jaintia Hills: KSU

Syllad | The Rising MeghalayaSeptember 24, 2023

Ka KSU ha u kyrwoh ba la phah da u publicity secretary Hame Ryngkhlem bad Chibait Rymbai assistant organising Secretary kila pan jingshai na ka Director jong ka DERT ka Kong RS Manner ha kaba iadei bad ka jingtei ne building jong ka BITEs kaba don ha Byndihati kaba la shu sah khongreng khlem da pyntreikam satia ia ka.

Ka KSU ka la ioh jingtip ba ia kane ka building kaba thmu ban pynlong kum ka jaka aijinghikai pyntbit ia ki samla pule kiba thmu ban long nonghikai, kala sdang naduh u snem 2012 bad la sdang ban shna ia ka ha u snem 2015, hynrei na ka liang ka KSU ka la lap ba ia kane ka building la shu sah khongreng haduh mynta bad kane long ka daw ba ka PWD kam pat aiti ia kane ka building sha ka Directorate of Educational Research &Training (DERT) ban pyntreikam pura.

La kynnoh ka tnad ba dei khmih bad pyntrei jong ka PWD (Buildings) ka long halor ka jingbym pat pyllait ia ka bill kaba kot sha kumba 3 klur tam kat haduh mynta da ka sorkar, bad kaei kaba pynglyngngoh ia ka seng ka long ba kane ka building ka lah dap 8 snem mynta bad ka sorkar ka la shu sngap mynthi ban pyllait noh kloi ia ka bill bad khnang ban ioh pyntreikam ia kane ka jingtei.

Ka KSU ka la ong ruh ba kaba sngewlyngngoh pat ka long ba sha kiwei ki district kiba don ka jaka pyntbit bad aijinghikai (DIET) ki la ioh ka jingiarap kaba haduh15 klur tang na ka bynta ban maramot. Katba ha East Jaintia ha kaba la hap ban shu ieh shrah watla ia ka building kaba la don 8 snem pura.

Halor kane na ka liang liang ka Director ka la pynshai ruh ba kitei ki building ki dei tang ba bynta ka Block Institute of Teachers Education bad lada ioh ka sanction kaba pura yn lah ban pynkylla sha ka District Institute of Teachers Education (DIET) jong ka district.

Naka liang jong ka Director kala kular ba kan leit jurip ia ka jinglong jingman jong kane ka building ha kine ki sngi ban wan bad ka la kular ruh ban phah pynkloi noh ia ka PWD ban aiti noh ia kane ka building sha ka DERT khnang ban pyntreikam noh ia ka, la ong u kyrwoh ka KSU.

Na ka liang ka KSU kala ong ba ka la leit jurip ruh ia ka residential school building kaba don ha katei hi ka shnong hynrei kumba ka long mynta kane ka building ruh ka dang shah ieh shrah bad ka long kaba i sepei ia ka pisa u paidbah. Ka KSU ka la pyrshang ban iakynduh ia u heh ba dei peit ia kane hynrei ym shem la iakynduh satia.