Kular ka kong Santa ban shna iaka surok bad pynioh sub centre iaka Jalaphet: KSU

Syllad | The Rising MeghalayaJuly 30, 2024

Ka KSU Jalaphet Unit hapoh ka jingialam u president samla Emmon Chyrmang bad u secretary V. Bareh, ha ka 27 tarik u Naitung 2024 kala ioh ban leit ia kynduh bad ai dorkhas haka Kong Santa Mary Shylla kaba dei ka MLA 5-Sutnga Saipung constituency ha ka ophis treikam jong ka ha Byndihati ban pynsgew bad dawa ban tyrwa skim ha ka ba iadei bad ki lynti synkieng ia ka jingdonkam ki nongshong shnong jong ka Jalaphet.

Ka KSU Jalaphet ha u kyrwoh kala pynpaw ba na nakaliang ka MLA ka thain kala kular ban pynbha iaki surok bad lynti iaid kjat bad surok nalor ban pynioh sa kawei ka sub centre ha katei ka shnong.

Ka KSU Jalaphet haka dorkhas kaba kala aiti sha ka kong Santa Mary Shylla kala dawa ban pynioh lynti iaid kjat (footpath) bad ban pynbha iaki surok shnong ha Jalaphet.

Footpath haka Surok PWD: Ban shna footpath naduh Jalaphet Pyrdung haduh Jalaphet Lumpathoi. Ka jingbym don footpath ha kane surok, ka buh jingeh ia ki nongshong shnong, khamtam ia ki khynnah skul, ha ka por leit skul ki hap iaid hapdeng surok ryngkat bad ki kali heh kaba juh wanrah ia ka jingjia aksident ia ki khynnah skul kumjuh ruh ia ki nongleit nongwan.

Surok naduh Jalaphet haduh Moolait: Ka jingsniew shaba palat pud une u surok wat tang ki kali heh ruh kim lah shuh ban iaid lyngba kane ka surok namar ba don ki thliew baheh baheh hapdeng surok. Kane ka buh jingeh khamtam haba don ka pang ka shitom, ngi hap poi sha jaka sumar da ki bun bun kynta.

Surok ban leit sha Khnap Thang Bru Moojiam: Haba don ka jingiap briew ha shnong, ki paidbah ki hap ban kit ia ki met iap da ka kali pickup na ing ban leit pynkhuid ia ka met iap sha u lum thang bru ba kyntang. Namar ba ktieh bad sniew kane surok ka bym pat don rong, kane ka buh jingeh ia ki nongshong shnong ban leit pynkhuid ia ka met iap.

Kyntiew kyrdan iaka Jalaphet Sub-Centre: Na ka liang ka MLA ka la kubur ba ka Jalaphet Sub-Centre ka bun ki nongshong shnong, hynrei ym lah ban upgrade ia kane ka Sub-Centre namar ka dang ia-jan than bad ka Sutnga CHC. Namar ban upgrade ia ka Sub-Centre sha ka PHC donkam ka jingjngai kumba 10 kilometers na kawei pat ka CHC. Hynrei na kaliang ka MLA kala ai ksai ba kan sa pynioh sa kawei pat ka Sub-Centre ha Jalaphet khnang ban bit ban biang ki nongshong shnong.