Kular ka Myntri ban pynkloi ia ki jingtei bad jingdonkam ba kyrkieh hapoh Civil Hospital Shillong

Syllad | The Rising MeghalayaOctober 17, 2023

Ka Myntri ka Tnat ka koit ka khiah ka sorkar jylla ka Kong Ampareen Lyngdoh haka sngi Nyngkong ka la pynlong ka jingleit jurip ia ka Civil Hospital, Shillong bad pynlong ruh ia ka jingialang bishar kam bad ki ophisar khnang ban khmih bniah halor ki jingdonkam kiba iadei bad ki jingtei bad kiwei pat ki bynta kiba donkam kyrkieh.

Ka Myntri ka la pyntip ba ki la shim ia ka rai ba ka jingpyniaid shakhmat ia ki kam hapoh kane ka hospital ka dei kaba la donkam kyrkieh, bad la bthah ruh ia ka tnat engineering wing ba kin pynkhreh ia ka projek kaba iadei bad kane ka bynta.

Ha kaba iadei bad staff kiba trei ha ka kontrak hapoh Civil Hospital, khamtam  kito kiba la shah pynkut noh dang shen kiba hap hapoh ka thup jong ka emergency staff category la kyntu ban shimkhia mardor namar ka jingdonkam hapoh ka dialysis unit, operation theater unit bad blood bank unit, kata ban ban thung bujli khnang ban pynthikna halor ka jingiaid beit ha ka rukom treikam jong kane ka hospital, ong ka Myntri.

Kumjuh na ka liang ka M.S. (Medical Superintendent)  S.S. (Surgeon Superintendent) kaCivil Hospital ruh ki la pyntip sha ka Myntri halor ka jingdonkam ba kyrkieh hapoh ki hostel na ka bynta ki nos bad ruh halor ka jingdonkam ban pyniar ia ka trauma center bad ICU khnang ban lah ban pynbiang ia ki jingdonkam ba kyrkieh.

Halor kane ka bynta na ka liang ka Myntri ka la pynthikna ba kan rah ia kine ki mat bad ki bor ba dei khmih khnang ban lah ban weng ia kine ki jingduna bad ban pynthikna ba ka Civil Hospital, Shillong kan lah ban ai ia ka jingshakri kaba paka.