Kular ka sokar ban pyllait iaka bhah JHADC, weng jingiakhih ki nongtrei

Syllad | The Rising MeghalayaNovember 20, 2023

Shisngi hadien ba la sdang biang iaka jingiakhih ban pyrshah iaka jingbym ioh tulop, ki nongtrei jong ka Jaintia Hills Autonomous District Council (JHADC) hapoh ka lama Jaintia Hills Autonomous District Council-Staff Association ki la weng noh iaka jingiakhih hadien ba ka sorkar kala kular ban shimkhia ban pyllait iaka bhah khajna ba dangsah jong ka konsil ha kaba kut jong une u bnai Naiwieng (November).

Ia kane la pyntip da ka Secretary jong ka Jaintia Hills Autonomous District Council sha ki nongtrei jong ka JHADC haba khot iaki ban iakren na ka bynta ban weng iaka jingiakhih ka jong ki kaba ki thmu ban pynlong lai sngi lynter ka ban kut haka 22 tarik une u bnai.

Shuwa kane kala don ka jingialang ki nongtrei bad ki ophisar ka konsil. Ka Secretary kala pynsngew ba ka jingpynlong iaka jingiakhih kaba khah khah ka ktah ia uba bun ba lang nalor ba ka ktah ruh iaka jingioh jong ka JHADC haka liang ka jingioh lum khajna kaba man ka sngi.

Kumta kala kyrpad iaki nongtrei ba kin weng noh iaka jingiakhih bad ngeit skhem ba lyngba jingtrei shitom jong ka EC bad ryngkat ki nongtrei ka konsil, ka sorkar Jylla kan shim khia ban pyllait iaka bhah ba dang sah jong ka konsil ha kaba kut jong une u bnai Naiwieng 2023.

Palat 500 ngut ki nongtrei jong ka Jaintia Hills Autonomous District Council (JHADC) haka sngi Nyngkong, ki la mih ha phyllaw ka JHADC ban pynlong iaka jingiakhih kaba jar jar ban pyrshah iaka jingbym ioh tulop mynta la 8 bnai kynthih.