Kular ka UDP ban pynkhlain ia ka Sixth Schedule, bhah kam 3% ia ki PWD, pyrshah tih Uranium, UCC

Syllad | The Rising MeghalayaFebruary 6, 2025

Ka United Democratic Party (UDP) ha ka 5 tarik Rymphang ka la pyllait ia ka mat treikam elekshon ne manifesto da kaba kular ban nangpynkhlain shuh shuh ia ka Sixth Schedule ka riti synshar ri bad ka jingbhah kam ba 3 % ia ki briew ba duna dkhot met (PWD) lada kan wan ha ka bor ha kane ka elekshon Autonomous District Council (ADC) ha Rilum Khasi Jaintia ka ban long la 21 tarik Rymphang.

Kine ki dei napdeng ki 20 tylli ki mat jingkular ba la pyllait paidbah da ka UDP ha ka jingialang kaba la long ha katei ka sngi ha ka jingiadon lang u Myntri sorkar u Bah Paul Lyngdoh, u CEM barim u Bah Titosstarwell Chyne, General Secretary Bah Jemino Mawthoh, ki MLA, MDC bad ki nongtrei jong ka party.

Ka UDP ka la pynieng haduh 40 ngut ki kyrtong ha kaba 23 ngut  kin iakhun na ki constituency ka Khasi Hills Autonomous District Council (KHADC) bad 16 ngut na ki constituency sha ka Jaintia Hills Autonomous District Council (JHADC).

Haba kren sha ki lad pathai khubor, u Bah Titos u la ong, “Ngi kular ban bhah kyrpang 3 percent ha ka thungkam thungjam na ka bynta ki briew kiba don jingduna ha ki dkho met ha ki District Counci. Kane ka dei ka sien kaba nyngkong ba kino kino ki party kin shimkhia ia kane ka mat. Ngi sngewkmen ban pyntreikam ia ka 3% ka bhah thungkam ia ki briew ba don jingduna ha ki dkho met lada ngi shah jied ha ka por.

Ka UDP kala kular ruh ba kan pyrshah jur ia kano kano ka jingthmu ban tih uranium kumjuh ban pyntreikam ia ka Uniform Civil Code (UCC) hapoh ka Jylla.

Haba ban jur halor ka jingdonkam ban pynkup bor ia ki ADC, une u MDC ka Sohra bad nongialam ka liang pyrshah ha KHADC u la ong, “Ngi kwah shuh shuh ban pynkupbor ia ki ADC khamtam ha ka jinglong trai ia ka khyndew ka shyiap bad ha kaba iadei bad ka para 3 jong ka Sixth Schedule.”

“Ngi dawa ruh ban bishar bniah biang ia ka 12 (a) (b) jong ka riti synshar ri bad ngi kwah ban pynkylla ia ki katto katne ki kyndon kiba iadei bad u Lat ka Jylla haba phai sha ka jingai jingbit ia kino kino ki Bill ba mynjur da ki ADC haba phai sha ka Article 200 jong ka riti synsahr ri,” u la ong.

Haba pynpaw ba ka UDP ka kwah ban pyntreikam ia ka nongrim jong ka ain kyntiap seng ha baroh ki ADC, u Bah Titos u la ong ba kane ka iarap ban tehlakam ia ka jingryngkang dieng kper jong ki MDC hadien ka elekshon.

Nalor kata u la pynpaw ruh ba ka UDP ka pyshah jur ia ka jingthmu ban kynthup ne ban shu jied ia u MDC ba shu sieh na ki jaidbynriew riewlum bym don nongmihkhmat (unrepresented Tribe) bad ruh ia ka jingpynjari ia ka Uniform Civil Code (UCC) ne kino kino ki Bill kiba long pyrshah ia ka bha ka miat ki paid riewlum.

U Bah Titos u la ong ruh ba ka manifesto ka ban jur ruh halor ka jingkongsan jong ka synshar khadar kaba khuid nalor ka jingkyntiew ia ki nongsumar dawai kynbat, ka jingiada ia ki khlaw ki btap bad ki ‘law kyntang bad ban pynteikam ia ka Solid Waste Management Act kumba ka long.