Kular pyllait ka sorkar Meghalaya ia ki advertisement bill

Syllad | The Rising MeghalayaMarch 29, 2020

U Bah Prestone Tynsong, Deputy Chief Minister ka Sorkar Jylla u la kular ban pyllait pisa mar shiteng ban siew ia ki bai advertisement bill jong ka sorkar sha ki lad pathai khubor ha ka jylla.

U Bah Tynsong u la ai ia kane ka jingkular ha ka jingiakynduh jongu bad ki nongialam ka Meghalaya Editors’ and Publishers’ Association (MEPA) mynta ka sngi (27 tarik Lber, 2020) ha kamra treikam jong u ha Main Secretariat.

Kane ka bai pynbna (advertisement bill) ka dei kaba la sahkut la bun bun snem ha ki tnat sorkar bapher bapher bad kala kynjoh sha ki klur tyngka. 

U Bah Tynsong u la kular ruh ban pynrung ia ka kot sada shon kot khubor (newsprint paper) kum ka mar donkam (essential item) khnang ba ki kor shon kot khubor (printing press) kiba don ha ka jylla kin lah ban leit thied ia kine ki kotsada na Assam.

Mynta kiba bun ki kot khubor ki shem jingeh ban ioh kotsada na ka daw jong kane ka jingkhang khyrdep iaki iew ki hat ha ka Ri baroh kawei.

U Bah Tynsong ula iakren ruh bad u Chief Secretary ka jylla u M S Rao ban pyndep noh kloi ïa kane ka kam bad ban ai jingiarap kat kaba donkam ha kaba pynpoi ia ka kotsada shon khubor na Assam sha Meghalaya.   

U Bah  John W. Thabah, General Secretary, Meghalaya Editors’ and Publishers’ Association (MEPA) ula ong ba synjuk ki Editors’ ba Publishers’ ki pynpaw ia ka jingsngewnguh ia u Bah Tynsong ia ka jinglakloi jong u ban weng ia ki jingeh kiba ki lad pathai khubor ki iakynduh ha kaba iadei bad kin ar tylli ki jingeh.