Kular u Amit Shah ban khmih bniah ia ki jingai jingmut jong ki 10 ADC ka thain North East
U Myntri kam Pohiing ka sorkar Pdeng u Amit Shah ha ka 25 tarik Naitung u la pynthikna ban shimkhia ia ki mat jingai jingmut bad jingdawa jong ki 10 tylli ki Autonomous District Council (ADC) jong ka thain Shatei Lam Mihngi (North East).
Ia kane ka jingkular u Amit Shah u la pynpaw ha ka jingiakynduh ia ka kynhun nongmihkhmat jong ki 10 tylli ki ADC ha katei ka sngi ha New Delhi.
![](https://www.syllad.com/wp-content/uploads/2024/09/JIT-Vacancy-823x1024.avif)
U Shah u la kular ruh ba ia baroh ki mat jingdawa jong ki 10 ADC yn sa khmih da ka Committee ban sa thaw kyrpang bad ruh ban pyndep ia kane ka kam hapoh ka 25 tarik u bnai u ban wan.
Ia kane la pyntip da u Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem uba dei ruh u convener jong kine ki 10 ADC hadien katei ka jingiakynduh bad u Amit Shah.
U Bah Pyniaid ula ong ruh ba baroh kine ki 10 tylli ki ADC ki don la ki jong ki jingeh bad ki jingdawa bapher bapher bad ia kane ka mat la iakren ha kane ka jingialang kaba shiteng kynta bad utei u Myntri ka sorkar Pdeng.
U la pyntip ruh ba baroh kine ki 10 tylli ki ADC kin sa iakynduh biang ha Shillong ha ka 10 tarik u Nailar u ban wan khnang ban iamir jingmut shuh shuh halor ka jingdonkam ban pynkhlain ia ki ADC hapoh ka thain North East.
“Ngi ki 10 ADC ngi pynpaw ka jingsngewnguh ia u Myntri kam Pohiing uba la sngap bad shimkhia ia kane ka kam jong ngi, kaba iadei bad ka jingpynkylla thymmai ia ka Sixth Schedule” ula ong.
Nalor kata na ka KHADC kala aiti ruh la ka jong ka dorkhas sha u Myntri kam Pohiing ha kaba iadei bad ki jingai jingmut halor ka jingpynkylla thymmai ia ki kyndon jong ka Sixth Schedule.Kine ki jingai jingmut ki kynthup ruh ia ka jingdawa ban pynbun ia ki shuki MDC sha ka 37 tylli ha kaba 6 tylli kin dei kiba da jied da u paidbah bad 2 tylli ki ban shu sieh ia kaba kawei dei ban ai bhah sha ki kynthei.
Na ka liang u Chairman ka kynhun The Indigenous Progressive Regional Alliance (ia kaba la tip ruh kum ka TIPRA Motha) u Pradyot Manikya Deb Barma u la ong, “Ngi sngewkmen ba u myntri kam Pohiing u la pynthikna ba ha kane ka shibnai ban wan kin sa pynbeit noh ia ki jingeh jong ngi baroh kaba mut ka 25 tarik u Nailar u ban wan, bad u la pynthikna ba lada ia ka jingiateh la iasoi ha ka por ba don kawei pat ka sorkar, kano kano ka jingkular ba la ai da ka sorkar India halor kano kano ka jingiateh ne kano kano ka jingamynjur kan ioh ia ka jingburom namar kata ka jingiateh la ka dei bad ka BJP ne ka Congress hynrei ka dei da ka sorkar India.”
Leave a Reply