Kular u Bah Banteidor ban shna noh iaka synthetic track tunnel gallery ha madan Kiang Nangbah Stadium, ka madan Futsal ha Jowai

Syllad | The Rising MeghalayaMarch 26, 2022

U Myntri ka Tnad Sports and Youth Affairs, u Bah Banteidor Lyngdoh ula kular ban shna noh shen iaka synthetic track, Tunnel ne ka jaka rung jaka mih ki player, gallery iaka madan Kiang Nangabh Stadium bad yn pynioh kawei ka madan ialehkai Futsal ha sor Jowai.

U Bah Banteidor Lyngdoh ula ong ia kane haka sngi Saitjain haba wan ban khyllie pyrda iaka jingrakhe ia u mawmer ba 50 snem (1972-2022) ka jingiaid lynti ka West Jaiñtia District Sports Association (WJDSA), kaba tip mynshuwa ka Jaintia District Sports Association (JDSA) kawei na ki synjuk kaba seng nongrim ban kyntiew ia kam ialehkai hapoh ka District.

U Bah Banteidor ula kren shai ba angnud eh ban pynioh ia kine ki jingtei shuwa ban poi ka samoi election namar ba WJDSA bad ka Jowai kala dei hok ban ioh ia kine ki jingtei ban kyntiew iaka standard jong ka jingialehkai la haka football, athletic bad kiwei kiwei ki jingialehkai.

“Iaka synthetic track, ka skim ka dei n aka Khelo India bad shuwa ka election ngi dei ban ioh ban plie paidbah ia kane nalor ka gallery bad tunnel ne ka jaka rung jaka mih ki player,” la ong u Bah Banteidor Lyngdoh

Shuh shuh ula ong ba West Jaintia Hills District da ka jingwan ki jingtei ka WJDSA kan lah shuh shuh ban kyntiew iaka kam ialehkai katkum ka jingiaid ka por.

Kawei pat ka jingkular kaba u Bantei ula khlei kalong ban wanrah iaka madan Futsal ha ryngkat bad ki flood light iaka sor Jowai bad ia ka jaka um pat pynbna, hynrei ula ong baka jingdon kane ka iarap iaki khynnah bad samla ban ioh ialehkai ban lait ngop ha kiwei ki kam ba sniew.  

Nakaliang u Bah Bantei ula synniang ruh T.5 lak sha ka WJDSA bad ula kular ban ai ka kti kamon ka diang naka bynta ban wanrah iaka roi ka par haka kam ialehkai.

Kiwei kiwei kiba don lang ki dei u Myntri ka tnad Social Welfare u Ma Kyrmen Shylla.

Ki nongialam barim bad mynta jong ka WJDSA kiba kynthup ia u Ma EMH Passah Working President, Ma Lammat OO Laloo, Hony General Secretary bad u Founder Member WJDSA Ma SK Lato kila iathuh iaka jingiaid lynti ka WJDSA. U Ma Patrick Lamare Vice President ula ai iaka jingkren pdiang bad U Ma Kennedy Shylla Joint Secretary ula ai iaka jingkren ai khublei.

La pynphuh pynphieng ia kane ka sngi da ka jingrwai jingshad bad ka dril na ki khynnah skul ka North Liberty Higher Secondary School, Jowai.