Kular u Bah Prestone ban pynbeit ia ki jingeh na ka jingkhang iaka kam tih maw tih shyiap

Syllad | The Rising MeghalayaFebruary 16, 2025

U President ka National People’s Party (NPP) ka Meghalaya bad Symbud Myntri Rangbah ka Jylla, u Bah  Prestone Tynsong u la pynthikna ban pynbeit ia ki jingeh kiba iadei bad ka jingkhang ia ka kam tih maw tih shyiap.

Ia kane u la pynpaw ha ka jingialang ialap elekshon ha ka 15 tarik Rymphang ha ka shnong Laitkroh ban pan jingkyrshan ia la u jong u pyrsa u Bah Rahboklang Tynsong uba dei u kyrtong ka party na Langkyrdem-Laitkroh constituency.

U la kyntu ruh ia  paidbah ka Saitsohpen, Sohra ba kin pynkhreh ban pdiang ia ki jingkyrkhu hadien ka elekshon ADC haba kren ha ka jingialang ialap elekshon ha ka 14 tarik Rymphang.

U la ong, “Ngi kwah ban kyntiew ia baroh ki kam pynroi ha kane ka constituency bad ka jylla hi baroh kawei. Hadien ka 24 tarik Rymphang, ym tang ba phin ioh ia u MDC, hynrei phin ioh ruh ia u Bah Prestone u ban long kum u kpa jong phi. Ngan iai bteng ban don ryngkat lang bad phi bad nga kyntu ia phi ba phin ailad ia u pyrsa jong nga ban long ka jingkieng hapdeng ka Elaka jong phi bad ka iing jong nga bad ka ophis jong nga ha Secretariat.”

“Khlem artatien ba ka jingkhang ia ka jingtih maw tih shyiap ka la ktah jur ia ka kamai kajih jong ki paidbah. Kumta ruh, nga kyrpad ia phi ban ap ia ka por kaba biang bad nga kyntu ia phi ban shaniah ha nga kum u briew uba la ju long u MLA jong phi (shwa ban phiah constituency) bad ruh ban shaniah ha ka NPP kaba dang ialam ia ka sorkar ka ban pynurlong ia ki jingangnud ki jong phi khnang ba ngin lah ban bteng ia ka kamai kajih. Nga kular ia kane sha phi ki paidbah ka constituency,” u la pynthikna.

U Bah Prestone u la kular ruh ban peit bniah ia ka hukum ba dang shen kaba khang pyrshah ia ka jingpyniatur masi bad ong, “Ha ka jingshisha kam shym la don ka jingpyniatur masi, hynrei ki don katto katne ki kynhun seng kiba na shabar kiba phah ia ki dur ki dar sha Delhi bad kynnoh ba ki la don ki kam pyniatur masi kiba khah khah, bad na ka liang ka Delhi ka la phah da ka shithi sha ka sorkar ban pan ia ka kaiphod ban shim ka jingpynshitom halor kane ka bynta. Ngan sa iakynduh ia ki katto katne ki nongialam hadien ka jingialang ban iakren ia kane ka phang bad nga kyntu iaphi ban ym shim ia kane kum ka jingeh namar ngan shim ia ka jingkitkhlieh kaba pura ban pynbeit ia kane ka jingeh.”

U Dy.CM u la kyntu ruh ia ki paidbah ba kim dei ban shah pynngop ha ki briew kiba tbit bha ban kren tang ha surok bad ong, “Ngam kwah ban kren shuh shuh, hynrei nga shu kyrpad ia phi ba phin sngewbha ban shaniah ha u Bah Prestone.”

Ha katei ka jingialap elekshon ha Saitsohpen, Sohra ban pan jingkyrshan ia u kyrtong ka party uba dei u MDC barim u Bah Donnevan Wahlang, u Bah Prestone u la ong, “Ngi la iakynduh haduh saw sien ia ki nongialam jong ka Elaka ba la ialam da ki sorkar. Ngi tip bha halor ki jingeh ki jong phi hynrei haduh mynta ngi dang pynkhreh ban shim ia ka rai kaba khatduh ha kaba iadei bad kane.

“Ngam wan hangne ban pynbiej ia u paidba namar ngi donkam ban shong satang kawei ka jingialang hashwa ba ngin poi sha ka thong. Kane kam dei ka rynsan kaba ngin iathuh iaphi, kynmaw ia ngi na ka bynta ki kam ba bha jong ngi namar ngim donkam ban ong ei ei, hynrei tang kawei ka jingshisha ka long ba lada ka jingeh kaba sahkut myna la bun bun snem bad ym don ba lah ban pynbeit ia ka dei tang ka NPP kaba lah ban weng ia kane ka jingeh,” u la bynrap.

Haba kdew ia kajuh ka jingiakynduh jong ki paidbah ka Williamnagar haba iadei bad ka jaka Sorkar, u Bah Prestone ula ong “ Ha u snem bala dep ka Kynhun Myntri jong ngi kala iakren ia kane ka kam ba kumno ngin pynbeit ia ka. Ka long kumjuh ha Williamnagar ha kaba ngi la lah ban pynbeit ia ka. Namar ngim kwah ia ka jingiasngewthuh bakla bad ba ki paidbah ka Williamnagar kin ym mad jingeh, kumta ngi lah pynbeit ia kane ka kam bad ki briew ka Williamnagar bad ki briew mynta kila ong ba ka NPP ka dei shisha ka jingkyrkhu na ka bynta jong ki”.

“Kumta nga pynthikna sha phi ba hadien kane ka elekshon MDC, ngan sa khot ia ka jingialang ban ia pynbeit halor kane ka mat bad ban rah ia kane ha ka jingialang ka kynhun Myntri, bad kumta long kiba la khreh ban ioh pdiang ia ka jingkhyrkhu,” bynrap shuh shuh shuh une u nongialam ka NPP.

Nalor kata u la  pyntip ruh ba ki don katto katne ki project ba kongsan kin sa sdang noh shen hapoh ka thain bad ki ban aijingmyntoi ia ki paidbah ka Saitsohpen bad ka thain Sohra.