Kular u CEM ka JHADC ban khynra trading laisen bad labour laisen ha ki sngi ban wan

Syllad | The Rising MeghalayaMarch 28, 2025

U Chief Executive Member jong ka JHADC u Ma Thombor Shiwat u la ong ba u dei u briew uba ngeit ban trei da ki kam ym da ki ktien haba ieng ban iada ia ka budget speech jong u kaba ym shym la kdew ia kino kino ki polsi treikam ne mat treikam kiba thymmai kumba la shah kynthoh ha ki MDC jong ka liang pyrshah.

U la ong shuh shuh ba lada pynmih ia ki rukom treikam ba thymmai ne ki polsi treikam kan shu pynheh ia ka jingduna pisa jong ka budget haba jubab ia ka jingkren kyllum ne ka general discussion ia ka budget ha ka Dorbar Mang Tyngka jong ka JHADC ha ka 27 tarik Lber.

U Ma Shiwat u la ong ba ka Executive Committee kan sa pynkhreh ia ki concept note jong baroh ki tnat treikam jong ka Council bad kin sa wad ia ki lad ki lynti kumno ban pynmih khajna bad u la kren shai bha ba u pdiang ia kino kino ki jingai jingmut na baroh ki MDC kynthup na ka liang pyrshah.

U Chief Executive Member jong ka JHADC u la iathuh ba ka Executive Committee kan pynthymmai noh ia ka ne renewal fee na bynta ka trading laisen bad labour laisen bad u la iathuh ruh ba ha ki por bala leit ki don ki waheh shnong bad ki Dolloi kiba ai jingiada ia ki nongtrei bar jylla ha ka por ba ka Council ka pynlong ia ka jingkhynra. Wat la katta ruh u Ma Shiwat u la ong ba ka Council kan sa pynlong shuh shuh ka jingkhynra ia ka labour laisen bad trading laisen khnang ban pynbor ia ki nongtrei bar jylla ban wanshim trading laisen bad labour laisen.

U Ma Shiwat u la kular ba ka Council kan sa buh biang ia ka Monitoring Gate ha man ki karkhana Cement ha Rilum Jaintia khnang ban khmih pyrkhing ia ka jingpyndonkam ia u mawshun bad tehlakam ia ka jinglait lan ka khajna. U la iathuh ruh ba ka Council ka ladep bthah ia ki seng kur baroh ha Rilum Jaintia ba ki dei ban wanrah ia ki jingbatai bniah halor ki kur jong ki sha ka Council khnang ban ai noh ia ka jingithuh.

U Chief Executive Member u la kular ruh ban pynthymmai noh ia ki kor pynsawa bad ki shuki hapoh ka iing Dorbar Thawain bad u la ong shuh shuh ba ka Council ka kyntiew ia ki jingrwai bad jingshad tynrai lyngba ki skim jong ka tnat Arts & Culture nalor katta ruh u la ong ba ka Council kan sa nang pynkhlain ia ka ophis treikam jong ka tnat Taxation ha Khliehriat bad u Executive Member i/c jong ka tnat Taxation yn sa shong treikam ha katei ka ophis shisien ne ar sien shi taiew. U la bynrap ruh ba ka Council kan sa pyntreikam noh ia ka Building Bye Law jong ka Council ha ki jaka shabar ka Municipal.

U Chief Executive Member u la kyntu ia ki nongtrei jong ka Council ba kin long kiba iatreilang bad ka Executive Committee khnang ban lah ban pyntyllun ia ki jingtreikam bapher bapher jong ka Council na bynta ka jingsuk jong u paidbah.