Kular u CM ban jurip bniah iaki aplikeshon ki san tylli ki karkhana coke

Syllad | The Rising MeghalayaFebruary 24, 2024

U Myntri Rangbah ka Jylla, u Conrad K Sangma ha ka 23 tarik mynta u bnai u la pynthikna ba da lade hi un bishar bniah ia ki aplikeshon jong ki santylli ki karkhana coke kiba la ioh dang shen ia ka consent to establish (CTE) lyngba ka Meghalaya State Pollution Control Board (MSPCB), bad maham ruh ban leh da kaba tyngeh lada lap ba ka don ka jingpynkhein aiñ.

Haba jubab ia ka jingkylli ba la wanrah ha ka zero hour notice da u nongmihkhmat ka UDP na Mowkaiaw, u Nujorki Sungoh hapoh ka iingdorbar thawain, u Sangma u la ong ba ki don ki kyndon ia kiba dei ban bud beit ryntih, bad kam don ka jingkylli ba kin don kino kino kiba pynkheiñ ia ki kyndon aiñ, bad lada ki iaid lait ia ki kyndon yn shim ia ki lad jingpynshitom pyrshah ia ki katkum ka ain.

“Nga pynthikna sha u dkhot ba kane ka dei ka mat kaba nga snewjan shibun bad dalade hi ngan khmih bad bishar bniah halor kine ki mat da kaba khmih bniah ia ki aplikeshon bad ban lap ia kiba kum kino ki sienjam la pyntreikam. Ngan sa khot ia ka jingialang ha ka kyrdan ka jong nga bad ka MSPCB bad ban ai ka jingpynshai sha u dkhot halor kane ka bynta,” ong u CM.

U la ong ruh, “Lada la bud katkum ki kyndon kumta ruh ngin ym lah ban khanglad iano iano ruh ba kin pyniaid shakhmat ia ki jingtreikam ki jong ki. Hynrei, lada ngi shem ba ka don ka jingpynkhein, Nga pynthikna na ka bynta ban shim ia ki lad jingpynshitom katkum ka ain.”

Da kaba pynpaw halor ka jingdonkam ban pyniabiang ha kaba iadei bad ka jinglong jingman ha ka mei mariang bad ka ioh ka kot, u CM  u la ong, “Ngi donkam ban shim ia ki sienjam ban kyntiew ia ki jingtrei jingktah, ka ioh ka kot bad ka roi ka par kaba ngi donkam, hynrei ngi donkam ruh ban khmih bniah ba kan ym don kano kano ka jingktah ia ka mariang. Kumta, kaba biang tam ka long ban pyniabiang lang halor baroh kine kiei kiei lyngba ka jingdon ia ki kyndon ain bapher bapher, ia ki rukom treikam bad ki polisi treikam ia kiba dei ban bud beit ryntih.”

U la ong khlem artatien ka don shisha ka jingsngewkhia hynrei haba phai sha ki jingtreikam kiba iadei bad ka ioh ka kot ngi donkam ban pyniaid shakhmat namar kine ki dei ki sienjam kiba la leh na ka bynta ban kyntiew ia ka kamai kajih bad ki lad ai kam aijam na ka bynta ka jylla.

Ka long ruh kaba bakla ban peit iaki karkhana coke ne ki karkhana kidei kiba sniew ne kin leh tang ia kaba sniew suda. Kane kalong ka rukom pyrkhat bakla bad ban shu pynkut baroh ki karkhana ki leh ia kaba sniew ia ngi, kumno ngin poi sha ka thong ban kiew haka ioh ka kot ne ka lad iohkam iohjam. Kumta kane ka rukom pyrkhat dei ban pynkylla, ka long kaba bakla ban ong ba kawei ba kawei ka karkhana ki long kiba sniew. Kane kam dei ka rukom, la ong u Conrad.

Halor ka jingsngewkhia kaba iadei bad ka koit ka khiah, u Sangma u la ong ba ka dei ka bynta jong ki jingtreikam bapher bapher kiba lah ban lam sha ki jinglong jingman kiba ktah ia ka koit ka khiah, bad kane ka dei ka jingshisha ha baroh ka pyrthei bad kumta donkam ia ka jingpyn iabiang.