Kular u CM ban thaw da ka committee halor ki kynrum kynram ba iadei bad u mot sahnam ki Garo

Syllad | The Rising MeghalayaMarch 28, 2025

U Myntri Rangbah ka jylla u Conrad K Sangma ha ka 27 tarik Lber u la bthah ban pynsangeh ia baroh ki kam ha u mot sahnam (Cenotaph) jong ka thma bah ba nyngkong bad kular ban thaw ia ka Committee hapoh ka shitaiew ban iakren bniah halor kane ka phang.

Ia kane u CM u la pynthikna sha ka kynhun jong ki sengbhalang kiba don hapoh ka Joint NGOs Forum of Garo Hills kiba la pynpaw pyrshah halor ka jingpynpra ba dang shen ia u mot jong ka thma bah ba nyngkong ha ka jingialang kaba la long ha ka iingsah jong u ha Tura, West Garo Hills.

Katkum u kyrwoh ba la pyllait da ki sengbhalang la ong ba hadien ka jingmir jingmut na ka liang u CM u la pynthikna sha ka kynhun ba yn shim mardor ia ki sienjam ban pynbeit noh ia kane ka kam.

“U CM u la pynthikna ba ia baroh ki kam ha une u mot yn pynsangeh noh tad haduh ban da pynbna da kumwei pat da kaba kular ruh ban thaw ia ka committee hapoh ka shitaiew ban pynbeit ia kane ka kam.Kane ka Committee u la pynthikna kan kynthup ia ki nongmihkhmat na ki sengbhalang, ki riew shemphang ha ka histori, ki nongialam ka thain bad ki dkhot jong ki shnong kiba shah ktah khnang ban pynthikna ba kino kino ki kam kiba iadei bad une u mot hadien habud kan long da ka lynti kaba shai bad kaba mynjur lang,” ka la ong.

Haba pdiang sngewbha ia kane ka jingkular jong u CM, ka Joint NGOs Forum watla katta ka la ong ba watla ka jingpynjot ka la dep jia, ka jingshim rai ban thaw ia ka Committee kaba thymmai ka long ka jingkyrmen ban pynioh ia ka hok bad ka jingpynbeit pat. Ka Forum ka la pynpaw ruh ba dei ban pynbahkhlieh ia kiba donkti halor kane ka jingpynpra kaba khlem jingbit bad ban pyntreikam ia ki sienjam kiba khlain khnang ban khanglad ia kum kine ki jingjia hadien habud.

Ka jingialang ka la long ka sienjam kaba kongsan ban weng ia ka jingbym sngewhun jong ki paidbah kaba la nangjur halor ka jingbym don ka jingshai ha ka rukom synshar bad ka jingbym sngewthuh ia ka kolshor haba phah sha ki mat kiba iadei bad ka pateng tynrai.